‘Rowers’ val diplomaat in PTA aan

ʼn Groep vermeende rowers het Woensdag glo op die Nigeriese adjunk-hoë kommissaris geskiet nadat hulle hom na bewering van die OR Tambo-lughawe tot by sy huis in Pretoria agtervolg het.

Kayode Oguntuase se bestuurder, Dan Mohlala, is tydens die skietery gewond, het Beeld Donderdag berig.

Volgens die berig is Oguntuase na die lughawe geneem om sy vrou, Hailey, te gaan oplaai. By hul huis in Waterkloofrif, het Mohlala opgemerk hulle is agtervolg. Hailey wou uit die voertuig klim, maar Mohlala het haar daarteen gewaarsku, en hulle het die voertuig se deure gesluit.

Die aanvallers wou die deure oopmaak, maar toe hulle dit nie kon regkry nie, het hulle verskeie kere op die voertuig geskiet.
Bure het die skote gehoor en die polisie ontbied, waarna die aanvallers op die vlug geslaan het. Oguntuase het Mohlala na ʼn nabygeleë hospitaal geneem.
Brig. Phuti Setati, ʼn polisiewoordvoerder, sê die polisie ondersoek aanklagte van poging tot moord en poging tot gewapende roof.

– Sapa

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.