Die sakeman Johann Rupert het ʼn aanbod van R2,34 miljard gemaak om ʼn maatskappy te koop wat ʼn groot aandeel in die mediagroep Caxton besit, berig Sunday Times.
Rupert het die aanbod gemaak om ElementOne te koop. Dié maatskappy besit ʼn 40% aandeel in Caxton en CTP Publishers and Printers. Caxton besit onder meer die dagblad The Citizen en verskeie ander gemeenskapskoerante. Rupert het die aanbod deur sy maatskappy, Remgro, gemaak. Remgro het in vennootskap met Rand Merchant Bank R475 miljoen in kontant aangebied en die res in aandele – geprys teen R22,51 per aandeel.
