Argieffoto ter illustrasie
Tien mans is in Braamfontein in Gauteng in hegtenis geneem in verband met die onwettige besit van vuurwapens.
“Polisielede wat patrolliewerk in die gebied gedoen het, het ʼn verdagte Toyota Quantum-voertuig opgemerk en die insittendes deursoek,” het lt.genl. Lesetja Mothiba, provinsiale kommissaris van die polisie, gesê. “Die polisie het 14 vuurwapens tydens die soektog opgespoor. Die verdagtes het nie vuurwapenlisensies by hulle gehad toe hulle in hegtenis geneem is nie.”
Die mans staan tereg op aanklag van die onwettige besit van 14 vuurwapens.
Die vuurwapens word vir ballistiese toetse gestuur om te bepaal of dit tydens enige ander misdaad soos taxigeweld of die onlangse reeks winkelsentrumrooftogte gebruik is.
“Die mans, tussen 25 en 48 jaar oud, is oorspronklik van Gauteng en KwaZulu-Natal,” het Mothiba bygevoeg. “Hulle sal Vrydag in die Johannesburgse landdroshof verskyn.”
Mooi so SAPS!!!!!!!!!!!!!! Wie weet waarheen die gemors oppad was en wat hulle wou doen met daai vuurwapens! Sorg nou net dat hulle agter tralies bly, vir lank!