11 betogers by Clicks-winkel in hegtenis geneem  

EFF-lede sing en dans in optog teen Clicks in die Highveld-winkelsentrum in Emalahleni (Foto: EFF Twitter)

Elf betogers is Donderdag in Jeffreysbaai in hegtenis geneem nadat hulle nie aan ʼn hofbevel gehoor gegee het nie.

EFF-lede het weer by die Clicks-winkel in die Fountains Mall-winkelsentrum betoog en die polisie is ontbied.

Volgens kol. Sibongile Soci, polisiewoordvoerder, is die betogers in hegtenis geneem nadat hulle glo Clicks-werknemers en klante gedreig het.

Die verdagtes, tussen 24 en 49 jaar oud, sal Vrydag in die Humansdorp-landdroshof verskyn.

Clicks het vroeër die week ʼn dringende interdik in die hooggeregshof in Johannesburg bekom nadat betogende lede van die EFF Maandag groot skade aan verskeie Clicks-winkels aangerig en die winkels verhoed het om sake te doen.

Ingevolge die bevel word die EFF en sy leiers verbied om enige werkers van die Clicks-groep te intimideer of te dreig. Die hof het die EFF bykomend verbied om enige klante aan die winkels te intimideer of te dreig, asook enige geweld teen die gewone handelsbedrywighede van die groep aan te hits.

Die EFF het laat Donderdagmiddag sy protesaksies opgehef nadat hy met die bestuur van Clicks vergader het. “Alle Clicks-winkels kan nou normale bedrywighede hervat,” het ʼn EFF-woordvoerder na afloop van die vergadering gesê.

Die gewraakte advertensie.

Clicks en die EFF het ooreengekom dat Clicks alle TRESemmé-produkte van sy rakke in al sy winkels sal verwyder en met produkte sal vervang wat plaaslik vervaardig is; dat Clicks ʼn minimum van 50 000 sanitêre doekies en 50 000 eenhede ontsmettingsmiddel en maskers sal skenk aan landelike en informele nedersettings, wat deur die EFF bepaal sal word; en dat Clicks ʼn beurs sal toeken aan vyf studente sodat hulle in die volgende akademiese jaar (2021) ʼn farmaseutiese studierigting kan volg. Al vyf moet vroue en swart Afrika-studente wees wat van ʼn landelike gebied kom en weeskinders weens MIV/vigs wees.

Die EFF het onderneem om saam met wetstoepassers te werk om seker te maak dat skoorsoekers, wat by die vandalisme by Clicks-winkels betrokke was, aangekeer word.

Die EFF het ook Donderdag met Unilever vergader en daar is ooreengekom dat alle TRESemmé-haarprodukte tien dae lank van alle winkelrakke in die land verwyder sal word. Unilever sal ook ʼn minimum van 10 000 sanitêre doekies aan inwoners van informele nedersettings – wat die EFF geïdentifiseer het – skenk.

Clicks het die afgelope naweek in die sop beland nadat hy ʼn TRESemmé-advertensie op sy webwerf geplaas het waarin na verskillende vroue se verskillende haarsoorte verwys word. In die advertensie word die byskrifte “frizzy & dull” en “dry & damaged” gebruik by die foto’s van swart vroue se natuurlike hare, terwyl die byskrifte “fine & flat” en “normal” by foto’s van wit vroue se natuurlike hare gebruik word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Lee

Awesome

Johan

Clicks word vir politieke redes geteiken. Wat van Shoprite, Woolworths, Pick n Pay, en Massmart en ander wat almal die produkte op hulle rakke het. Maak nie sin nie.

Kaal Keiser

Die mense weet ook nie wat hul wil he nie – as net wit mense in ‘n advertensie gebruik word dan is dit ‘n probleem. Nou word minder wittes gebruik en meer van die vereiste velkleur… en nou toi toi hulle. Mens kan ook nie wen nie

Ronel

10 000 en 50 000 doekies of pakke doekies? Groot verskil.

Blikke

Wat n grap…..mors van tyd en belasting geld….