12 polisielede vas oor afsondering-oortredings

Die foto wat wys hoe van die beamptes deur hul kollegas in hegtenis geneem word, is wyd op sosiale media versprei.

Altesaam 12 polisiebeamptes is oor die naweek in drie afsonderlike voorvalle in hegtenis geneem vir die beweerde oortreding van die regulasies van die afsonderingstydperk en korrupsie.

Vyf beamptes, insluitend ʼn reservis, is in Phuthaditjhaba in die Vrystaat in hegtenis geneem, het brig. Vishnu Naidoo, nasionale polisiewoordvoerder, gesê. Die beamptes was glo deel van ʼn groep wat Saterdag alkohol by ʼn plaaslike taverne gedrink het.

“Die beamptes kon aanvanklik daarin slaag om te ontvlug, maar is Sondag in hegtenis geneem toe hulle vir diens aangemeld het.” Die 44-jarige eienaar van die taverne is ook in hegtenis geneem. “Daar is op alkohol beslag gelê en die taverne is gesluit.” Die polisiebeamptes sal van regsverydeling en die oortreding van die afsonderingsregulasies aangekla word.

Intussen is ses polisiebeamptes wat aan die Brooklyn- en die Silverton-polisiestasie verbonde is Saterdag in hegtenis geneem nadat hulle glo R30 000 gesteel het van mense wat by ʼn padblokkade voorgekeer is. “Daar is inligting ontvang dat die beamptes glo eers R100 se omkoopgeld van die motoris en sy twee passasiers geëis het aangesien hulle nie in besit van die nodige dokumente was nie.”

Die beamptes het toe glo die motor deursoek waarna hulle op die geld afgekom het. “Die beamptes is in hegtenis geneem nadat die geld in hul besit gevind is en hulle is tans in aanhouding.”

Nog ʼn polisiebeampte is in hegtenis geneem nadat hy glo ʼn byeenkoms by die polisie-barakke in Soshanguve, noord van Pretoria, gehou het.

“Al die beamptes word krimineel aangekla terwyl departementele prosesse ook gevolg sal word. Die bestryding van korrupsie en die herstel van die polisiediens se integriteit bly ʼn topprioriteit vir die polisie se bestuur.”

Genl. Khehla Sitole, nasionale polisiekommissaris, het die inhegtenisnemings verwelkom.

“Die inhegtenisneming van ons lede is teleurstellend, maar terselfdertyd verblydend in ’n sekere sin aangesien dit wys dat die SAPD onbevooroordeeld bly en die vermoë het om kriminaliteit in sy geledere beslissend te hanteer,” het Sitole gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

23 Kommentare

jongste oudste gewildste
Zebratjie

Our Law(less) and order(less)

Boortor

Ja cele…en wat gaan nou aan!??. Moet ek my GPF manne stuur om jou te help om jou ” gekeurde” polisie lede dop te hou? Jammer maar jy se hulle mag nie! So.. sterkte my hoed generaal!

Eerlik

Dissipline bestaan nie meer in SA se magte nie.

SomeOne

ook die lede in uniform val in die web van versoeking, sies

net my mening

Hoe is dit dan moontlik? Hulle agtergronde is dan so goed nagegaan volgens Mnr Cele?