Die liggaam van ʼn 15-jarige seun is Sondagoggend uit ʼn steengroefdam in Emzinoni naby Bethal in Mpumalanga gehaal.
ER24, Delta 1 Rescue, Lydenburg se soek- en reddingsdiens en die polisie is in kennis gestel van die voorval ná die seun Saterdagmiddag verdwyn het toe hy saam met vriende gaan swem het.
Russel Meiring, woordvoerder van ER24, sê reddingsduikers het die toneel begin fynkam en ná ʼn paar minute op die seun se liggaam afgekom. Paramedici kon ongelukkig nie enigiets vir hom doen nie en hy is dood verklaar.
Plaaslike owerhede stel ondersoek in.