19-jarige vas oor Bonnievale-plaasmoord

Die Wessels-gesin. Van links is Liezel (51), Annelie (23), Jana (19) en Tool (53). Foto: verskaf

Die polisie ondervra ʼn 19-jarige verdagte in verband met die moord op die Bonnievale-boer Tool Wessels (53) en die poging tot moord op sy vrou, Liezel (51).

“Een van die vuurwapens wat tydens die voorval gesteel is, ʼn .22-geweer, is gekonfiskeer,” het lt.kol. André Traut, Wes-Kaapse polisiewoordvoerder, gesê.

Maroela Media het vroeër berig die Wessels-egpaar is Dinsdagaand op hulle plaas Kapteinsdrift oorrompel, vermoedelik deur vier mans met klapmusse. Liezel het pas teruggekeer van ʼn atletiekoefening en Tool het werkers op die dorp gaan aflaai. Die aanvallers het hulle vermoedelik op die plaas ingewag.

Die egpaar en hulle dogters, Annelie (23) en haar suster, Jana (19), boer al sedert 2000 op die plaas, hoofsaaklik met druiwe, appelkose en perskes.

Liezel is tydens die aanval met ʼn skerp voorwerp in die bors gesteek en met kookwater op haar rug gebrand. Annelie het vanoggend gesê haar ma word steeds in die hospitaal op Worcester behandel.

“My ma het nog baie pyn en sy kan nog nie regop sit of plat lê nie, maar sy is heeltemal wakker. Sy weet presies wat aangaan,” het Annelie gesê.

Liezel moet nog tot minstens oormôre in die hospitaal bly. Annelie het gesê daar was die afgelope paar dae geweldig baie besoekers wat die gesin kom ondersteun het.

Liezel het tydens die aanval haar bewussyn verloor en by die bure gaan hulp soek toe sy weer wakker geword het. Haar man se liggaam is ná ʼn soektog ʼn ent weg van die huis gevind. Hy was reeds dood.

Volgens die polisie sal die verdagte in die hof verskyn sodra hy aangekla word.

“Die ander verdagtes wat in die voorval betrokke was, is nog soek,” het Traut gesê.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

45 Kommentare

jongste oudste gewildste
juba

19 ? Van watter ouderdom af begin hulle moor

Anoniem

Hy verskyn in die HOF en wat DAN ! Fooitog wat van Sy regte ? Pateties ! ?

marous

Gee hom vir die werkers wat nou sonder heenkome is .

Vintcent

Korrupte regering en regstelsel is ten gunste van kriminele…maar dit is mos waarvoor SA gestem het.

GM

Juba, op skool al – as ek moet kyk na al die skêrstekery wat in die verlede al plaasgevind het.