2 dood, talle beseer ná petrolbom-aanval op bus

Die uitgebrande bus. Foto: ANA

Die uitgebrande bus. Foto: ANA

Die polisie in die Wes-Kaap ondersoek twee sake van moord nadat ‘n dubbeldekkerbus Dinsdagaand in die Strand met ‘n petrolbom bestook is.

Konst. Noloyiso Rwexana, woordvoerder van die polisie, het gesê talle sake van poging tot moord word ook ondersoek. “Volgens berigte het die bus in Onverwachtstraat gery toe dit met petrolbomme bestook is. Twee mense is dood en minstens 11 mense beseer.”

Rwexana het gesê die omstandighede rondom die voorval word ondersoek en niemand is nog in hegtenis geneem nie. Werner Vermaak, woordvoerder van ER24, het in ‘n verklaring gesê twee mans is in die aanval dood en minstens 32 passasiers is beseer.

JP Smith, burgermeesterskomiteelid vir veiligheid en sekuriteit, het gesê twee brandweerwaens en ‘n reddingsvoertuig is ontbied om die brand te blus wat deur die petrolbomme veroorsaak is. Volgens hom het die stad se nooddienste vier mense behandel vir ernstige brandwonde voordat hulle na ‘n hospitaal vervoer is.

Smith het gesê talle ander passasiers wat bo in die bus gesit het, ontvang behandeling vir brandwonde in verskeie hospitale. “Dit is malligheid. Dit is net te aaklig. Dit was ‘n langafstandbus en êrens is ‘n ma of dogter of suster wat wag vir die twee mans wat doodgebrand het.”

InterCape het ‘n kort verklaring uitgereik ná die aanval en bevestig dat een van sy busse met petrolbomme aangeval is in die Strand. “Die voorval word ondersoek en die motief vir die afskuwelike aanval is nog nie duidelik nie. Ons gedagtes en gebede is met diegene wat deur die skokkende voorval geraak word.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

13 Kommentare

jongste oudste gewildste
Gawie

En word ‘n saak van terrorisme ondersoek? Hoekom net moord en poging tot moord?

Peet Schabort

Terrorisme as deel van ‘n onregeerbare land veroorsaak deur wanbestuur.

Lynette

Wat van die skade aan die bus? Saakbeskadiging?

alida

Genade tog wat is volgende. Intercape is ‘n vervoermiddel vir mense wat nie lugvervoer kan bekostig nie. Wat sou die motief agter dit wees? Ek ry nooit weer met enige van daardie busse nie. Dit is barbaars en afskuwelik!!!

TSHEPO

Baie sleg wat gebuer het hoop regtig die skildiges word gevang