2 van 3 moordbeskuldigdes weer vas oor nóg ʼn moord

Van links is Shaun Oosthuizen (38), Mandy Vorster (47) en Johnny du Plooy (28). Foto met vergunning van Laevelder.

Twee van die drie verdagtes wat borgtog toegestaan is nadat hulle in hegtenis geneem is in verband met die wrede moord op Hetta Potgieter, is weer in hegtenis geneem in verband met nog ʼn moord.

Johnny du Plooy (28), Shaun Oosthuizen (38) en Mandy Vorster (47) is in Julie in hegtenis geneem in verband met die moord op die 85-jarige Potgieter nadat haar liggaam op 9 Julie in haar selfsorgeenheid by die Macadamia-versorgingsoord in Nelspruit in Mpumalanga gevind is.

Die verdagtes is in ʼn karavaanpark in Krugersdorp in hegtenis geneem waarna hulle na Nelspruit geneem is. Hulle is op 3 Augustus in die Nelspruit-landdroshof op borgtog van R2 000 elk vrygelaat.

Die polisie het bevestig Du Plooy en Oosthuizen is intussen Woensdagaand weer in Krugersdorp in hegtenis geneem, dié keer in verband met die moord op ʼn bejaarde vrou in Alberton.

Die verdagtes toe hulle die eerste keer in hegtenis geneem is. (Foto verskaf aan Maroela Media)

Hulle sal na verwagting Maandag in die hof verskyn. Die moontlikheid word ook ondersoek dat hulle met tot ses moorde verbind kan word.

Maroela Media het vroeër berig Potgieter se liggaam is aangetref met haar hande vasgebind en ʼn voorwerp om haar nek gebind. Haar liggaam is in die badkamer gevind. Daar is glo R10 000 kontant van Potgieter gesteel. Sy het die geld by haar gehad om haar maandelikse betalings te doen.

Al drie verdagtes is veronderstel om op 26 Oktober weer in die Nelspruit-landdroshof te verskyn in verband met die moord op Potgieter.

Die Laevelder het destyds tydens die drie se borgtogaansoeke berig dat Oosthuizen sewe vorige veroordelings het vir diefstal. Vorster het vier vorige veroordelings, waaronder aanranding. Du Plooy het geen vorige veroordelings nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

32 Kommentare

jongste oudste gewildste
Irene

Dit gebeur as moordenaars weer los gelaat word dan kry onskuldige mense seer

Bere hul nou vir lewenslank

Lynette

Hoe kry ‘n verdagte wat aangekla word vir moord – borgtog?? Dis al wat ek wil weet.

M

absoluut! hoekom borg gee!?

Cherokee

Jy gebruik die woord ‘ewig’ (te) roekeloos. Dit is ‘n term wat bo die menslike begrip is.

WIEBO

Ek skaam my dat daar wit mense is wat sulke gemors is! Julle is flippen slegte goed!!