Argieffoto
Twee verdagtes is Maandag in hegtenis geneem in verband met die moord op ʼn vyfjarige seuntjie dié naweek in Lavender Hill in die Wes-Kaap.
Brig. Novela Potelwa, woordvoerder van die polisie, sê die polisie het onverpoosd na die verdagtes gesoek nadat die kind Saterdagmiddag tydens ʼn skietery in Drury Court in die spervuur beland het.
ʼn 22-jarige man is ook na bewering in dieselfde voorval geskiet en gewond. Hy is in ʼn kritieke toestand in die hospitaal.
Volgens Potelwa sal die verdagtes, onderskeidelik 24 en 29 jaar oud, op 27 Desember in ʼn hof verskyn op aanklagte van moord en poging tot moord.
Die verdagtes word ook moontlik aan ander misdade verbind.
