22 sterf binne 12 uur op KwaZulu-Natalse paaie

Mxolisi Kaunda, LUR vir vervoer, gemeenskapsveiligheid en samewerking in KwaZulu-Natal (Foto: ANA)

Altesaam 22 persone is Saterdag dood op paaie in KwaZulu-Natal, met een ongeluk op die N2 naby Empangeni wat 15 lewens geëis het.

ʼn Voorlopige ondersoek het aan die lig gebring dat ʼn Mercedes-Benz en ʼn Toyota Quantum mekaar reg van voor getref het en 14 persone is op slag dood. ʼn Span ondersoekbeamptes en forensiese kenners is aangestel om die oorsaak van die ongeluk te bepaal, het Mxolisi Kaunda, LUR vir vervoer, gemeenskapsveiligheid en samewerking in KwaZulu-Natal, gesê.

Die departement van vervoer sal ook ʼn span ingenieurs stuur om ondersoek in te stel oor die stuk pad om te bepaal of bykomende veiligheidsmaatreëls vereis word.

Kaunda het gesê hy het Sondag, toe hy die toneel besoek het, wetstoepassers versoek om strenger op te tree teen roekelose bestuurders.

Sewe persone is dood in ʼn ongeluk Saterdag in Appelsbosch, noord van Durban.

Kaunda het gesê die voorvalle sal nie die provinsie verhinder van sy toewyding om padongelukke en noodlottige ongelukke tydens die feesgety met meer as 10% te verminder nie.

“Ons het Saterdag ʼn geïntegreerde veiligheidsplan van stapel gestuur wat op hoë sigbaarheid fokus in al die gevaarlike dele van die provinsie. Ons sal strenger optree teen dronkbestuur, spoedoortredings, onpadwaardige voertuie en motoriste wat sonder rybewyse rondry,” het Kaunda Sondag gesê.

Hy het die oorlewendes van die N2-ongeluk by Ngwelezane-hospitaal besoek en betuig sy meegevoel met die families van die slagoffers.

Hy doen ook ʼn beroep op inwoners van KwaZulu-Natal, veral padgebruikers, om saam met die regering te werk om padongelukke te verminder. “Ons sal die stryd teen noodlottige ongelukke wen as ons saam werk en met een stem sê dat padongelukke nie deel sal wees van ons lewens nie. Kom ons vat hande en maak seker dat ons almal aan die padreëls voldoen.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

21 Kommentare

jongste oudste gewildste
Alida

Begin by die taxies met julle ondersoek. Die paaie is nie so sleg nie. Die bestuurders van die taxies is die probleem.

Gertryda

As hul dink dis erg het die spietkops nog nie die pad tussen Greytown Pmb gery nie
Dis n jaagbaan en daar beteken verkeerstekens niks nie
Die Appelbosch pad is net so erg
Geen gehoor van padtekens nie
Miskien as die spietkops meer patrollie doen as om by die T aansluiting by Wartburg te sit sal dit effens help
Maar voor 8 en na 4 is daar geen verkeerspolisie op pasie nie

piper

padwaardigheid? oor n afstand van sowat 12 Km. tel ek nooit minder as 10 voertuie met foutiewe ligte. die rekord is 27. party het geen ligte nie en party ry net met hulle ” hazards” aan.

Grassie

In die vorige berig word vertel van 12 toetsbeamptes wat vir bedrog gearresteer is. Hierdie soort bedrog is iets wat daagliks landwyd plaasvind. Ek wonder hoeveel onpadwaardige voertuie en onbevoegde voertuigbestuurders is daagliks met “wettige” dokumente op ons paaie.

Manie

Ek dink deel van die probleem is grootskaalse omkopery vir lisensies. Paar mense het die afgelope tyd my vertel van mense wat lisensies koop. Hier is eenvoudig net te veel bedrog en ek sê die regering het nie die wil om enige iets daaraan te doen. Verder is die gedrag van onverantwoordelike bestuurders baie arrogant. Ek het my motor se toeter vir n bestuurder geblaas verlede week wat besig was om op sy selfoon te tik terwyl hy bestuur. Die vreeslikste vingertaal is toe vir my gewys