27 reeds vas vir geweld in KZN

Die betogers is glo vies omdat oudpres. Jacob Zuma in hegtenis geneem is (Foto: Skermskoot)

Altesaam 27 verdagtes is reeds in hegtenis geneem vir misdade wat verband hou met gewelddadige betogings in KwaZulu-Natal. Betogings kom sedert gister in dié provinsie voor.

Pres. Cyril Ramaphosa het intussen ʼn beroep op gemeenskappe in KwaZulu-Natal gedoen om hulself daarvan te weerhou om by kriminele aktiwiteite betrokke te raak en sodoende ekonomiese vooruitgang te belemmer.

Maroela Media het vroeër berig verskeie hoofpaaie is met brandende voorwerpe versper en 26 vragmotors is reeds deur betogers aan die brand gesteek. Betogers is ontevrede oor die inhegtenisneming van oudpres. Jacob Zuma vroeër die week.

Luidens ʼn verklaring deur die polisie in KwaZulu-Natal is 27 mense sedert Vrydag in hegtenis geneem en word aangekla van onder meer openbare geweld, sakeroof en oortreding van die afsonderingsregulasies.

Brig. Jay Naiker, woordvoerder van polisie in KwaZulu-Natal, het Saterdagmiddag gesê die M3 by Mooirivier is steeds gesluit terwyl polisie en ander wetstoepassingsowerhede spook om die gebrande trokke en ander vullis uit die pad te verwyder.

Betogers het deur die nag altesaam 26 vragmotors uitgebrand (Foto: Rob Beezy, Twitter)

“Motoriste word aangesê om eerder van alternatiewe roetes gebruik te maak of hierdie gebied versigtig te nader. Polisiebeamptes is steeds hier ontplooi om seker te maak dat geweld nie opvlam nie.”

Ramaphosa het die inhegtenisnemings geloof en gesê die redes wat aangevoer word vir protesoptogte in KwaZulu-Natal kan nie vandalisme en openbare geweld regverdig nie. “Die Grondwet beskerm Suid-Afrikaners se reg om te betoog, maar dit kan nie as verskoning gebruik word om die wet te oortree of eiendom te beskadig nie.

Dr. Pieter Groenewald, leier van die VF Plus, het gesê die skade wat met die betogings gepaard gaan, is vernietigend vir die land se reeds haglike ekonomiese situasie.

“Dit skaad die land se beeld in die buiteland en sal voornemende beleggers afskrik om hier te belê.

Daar is tans baie boodskappe wat op sosiale media die rondte doen wat geweld aanhits terwyl die vernietiging van eiendom, vragmotors wat aan die brand gesteek word en oproerige byeenkomste daagliks voorkom.”

Hy sê dit is onaanvaarbaar dat die interne gevegte van die ANC nou ontwikkel het in openbare onrus en geweld.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

37 Kommentare

jongste oudste gewildste
Tanniepetoors

Net 27? Moes teen die tyd 2700 gewees het.

Andre

Net om Maandag weer uit te wees op R500 borgtog, en dan sien jy hom nie weer nie.

Persheks Adri

So min uit daai hordes betogers gggmmmfff ek’s seker julle kon beter doen! Cyril versoek al wéér plaas gee hy instruksies nee hel man kom by en kyk wat doen jou mense! Dis pateties verby werklik!!!

Esme

Hoor vroeer hoe die SAPD se lede gedreig word as hulle wil optree. Dit klink vir my so al na die verhaal van Afrika. Geweld, verwoesting, verwisseling van leierskap, diktatorskap en die uiteinde is chaos wat in werklikheid nooit herstel word nie.

Arthur

Maak soos op Marikana. “This is an unlawful assembly……… was die in Senekal, was daar al geskiet.