Drie verdagtes is buite Mokopane (Potgietersrus) in Limpopo in hegtenis geneem vir hul beweerde betrokkenheid by ’n sakeroof en kaping wat Woensdagaand in dié omgewing plaasgevind het.
Daar word intussen vermoed dat die verdagtes moontlik deel is van ’n misdaadsindikaat nadat die polisie beslag gelê het op onder meer gesteelde voertuie en springstowwe.
Kol. Moatshe Ngoepe, woordvoerder van die polisie, sê die drie verdagtes is vanoggend (Donderdag) in hegtenis geneem nadat polisiebeamptes ’n voertuig wat by die beskrywing van ’n gekaapte wit Nissan NP300 pas in die omgewing van Mahwelereng Hospital View opgemerk het.
Die polisiebeamptes het dié voertuig deursoek en op onder meer ’n ongelisensieerde vuurwapen, ’n mes, 12 eenhede springstof en elektriese kabels afgekom.
Die polisiebeamptes het ook op ’n tweede voertuig in die omgewing afgekom. Die oorsprong van dié voertuig sal deur die polisie se ondersoek bepaal word.
Die verdagtes, tussen 27 en 34 jaar oud, sal na verwagting Dinsdag voor die landdroshof in Mahwelereng verskyn op aanklagte van die besit van vermoedelik gesteelde motorvoertuie, motorkaping, die besit van ’n ongelisensieerde vuurwapen, sakeroof en die besit van springstof.
Lt.genl. Nneke Ledwaba, provinsiale polisiehoof, het intussen gewaarsku dat die polisie slaggereed is om misdaad gedurende die Paasnaweek te bekamp. Lede van die publiek word versoek om enige misdadige aktiwiteite in hul omgewing by die polisie aan te meld.
Ag nee wat, hulle is amateurs teen Zuma. Hy het nie eers springstof nodig gehad nie :-)
En hy en ander kaders nog steeds op vrye voet ook.