7 dood in 2 Oos-Kaapse ongelukke

Die ongelukstoneel tussen Willowmore en Aberdeen. (Foto: Verskaf)

Altesaam sewe mense het vanoggend in twee onderskeie motorongelukke in die Oos-Kaap omgekom.

Unathi Binqose, provinsiale woordvoerder van die departement van vervoer, het gesê vier familielede is omstreeks 06:30 op die N9 tussen Willowmore en Aberdeen dood nadat die bestuurder van ʼn Kia beheer oor dié motor verloor en die motor omgeslaan het.

Die oorledenes sluit ʼn vrou, twee mans en ʼn kind in.

Twee ander insittendes, ʼn man en ʼn vrou, het kritieke beserings in die voorval opgedoen en is na ʼn hospitaal in Willowmore gehaas vir mediese behandeling.

Volgens Binqose was die insittendes vanaf George na Pearston onderweg toe die voorval plaasgevind het. Daar word in dié stadium beweer dat spoed tot die ongeluk bygedra het.

Die ongelukstoneel tussen Willowmore en Aberdeen. (Foto: Verskaf)

Die Willowmore-polisie ondersoek ʼn saak van strafbare manslag.

Drie mense is kort daarna in ʼn soortgelyke motorongeluk in Grahamstad dood nadat die bestuurder van ʼn Toyota Avanza óók beheer oor die motor verloor en die motor omgeslaan het.

Binqose sê die voorval het omstreeks 07:00 op die N2 plaasgevind. Agt insittendes, vermoedelik ook familie van mekaar, was onderweg na ʼn begrafnis in Peddie.

Vier insittendes het kritieke beserings in dié ongeluk opgedoen en is na die Nompumelelo-hospitaal gehaas vir mediese behandeling. Die bestuurder is ongedeerd.

Die polisie ondersoek ʼn saak van strafbare manslag.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

19 Kommentare

jongste oudste gewildste
Marianne

SPOED VRATE SAAI VERWOESTING EN HARTSEER OP ONS PAAIE….
Mense ek maan julle ASSEBLIEF – ry eerder 30min vroeèr as beplan en wees geduldig op die pad, as wat julle nie jul eind bestemmings bereik nie.

Sampie

Sien by albei ongelukke sper strepe wonder wat het gebeur

Pitbul

As ek reg gelees het was daar 6 in die Kia… Klink heel te mal te veel lewens in een karretjie..

Ig

Spoed, spoed, spoed vs nalatigheid die inding vandag

Cobus Panther

Het gisteraand by n stop ry tussen Rouxville en Smithfield agter VW Polo gestaan toe die bestuurder en sy passasiers uitklim en langs die kar staan en drink wyl ons wag vir die robot on te ry….was so 20H00 gewees…geen wonder die ongelukke gedy..geen verkeersbeamptes….werk dalk net dagskof….