ʼn Sewejarige seun van Pietermaritzburg in KwaZulu-Natal is dood en ʼn ander seun, wie se ouderdom nie bekend is nie, is ernstig beseer toe die bestuurder van ʼn minibustaxi die seuns raakgery het.
Ineke van Huyssteen, ER24-woordvoerder, sê die voorval het Vrydagmiddag op Sweetwatersweg plaasgevind.
Volgens Van Huyssteen is die sewejarige seun met die impak van die botsing tot in die bosse langs die pad geslinger. Sy sê hy het noodlottige beserings opgedoen en is op die toneel dood verklaar.
“ʼn Tweede seun is ook ernstig beseer in die voorval, maar is voor ER24-paramedici se aankoms op die toneel reeds deur private ambulansdienste na ʼn hospitaal vervoer,” sê sy.
Volgens berigte op sosiale media was die twee seuns vriende. Van Huyssteen kon nie duidelikheid gee oor die presiese gebeure rondom die ongeluk nie.
Die voorval word deur die polisie ondersoek.