7de Laan-aktrise se familielid sterf in Knysna-brande

Annelize van der Ryst (Foto: Facebook)

Annelize van der Ryst, beter bekend as “Matrone Netta Nortje” van 7de Laan, se neef is oorlede tydens die verwoestende brande in Knysna.

Van der Ryst het op Facebook bevestig haar neef, Dawie van der Ryst, het ʼn hartaanval gehad toe hy en sy vrou en hul honde uit hul huis in Knysna gevlug het. “Dawie het die motor stilgehou, uitgeklim en nog een keer vir die huis gekyk en gesien hoe hul eiendom in die brand verwoes word. Hy het inmekaargesak en gesterf,” het sy gesê. “Ek dink aan Elsabè, hul kinders en kleinkinders asook die ander mense wat deur hierdie vreeslike brand geraak word.”

Die Knysna-munisipaliteit het intussen bevestig Knysna is as ʼn rampgebied verklaar. “Ons versoek inwoners om asseblief veilig te bly en weg te bly van enige brande.”

Meer as 10 000 mense is sedert Woensdag uit die gebied ontruim. Die brande het deur ongeveer 20 woonbuurte in Knysna en die omliggende omgewing gewoed. Minstens 300 strukture is deur die brande verwoes.

Van der Ryst is die vyfde persoon wat in die Knysna-brande omgekom het. Maroela Media het vroeër berig ʼn gesin van drie is in Rheenendal oorlede toe hulle nie van die brand kon ontvlug nie en ʼn vierjarige meisie van Welbedacht is dood aangetref deur haar pa.

Besonderhede rondom die sterftes bly skaars, weens die onvermoë om spesifieke ondersoeke van stapel te stuur.

Knysna-brande (Foto: Twitter)

Die maatskappy DHL het intussen bevestig dat hulle gratis noodsaaklike voorraad soos nie-bederfbare kos, komberse, klere en noodhulpvoorraad aan die streek sal versprei. “Ons werk saam met die Stad Kaapstad om noodsaaklike voorraad te versprei,” het Megan Roper, hoof van bemarking vir DHL Express Sub-Sahara Afrika, gesê. Alle brandweerstasies in Kaapstad is amptelike aflaaipunte vir donasies. DHL het ook 39 plekke oor die land heen beskikbaar gemaak waar persone nie-bederfbare kos en ander noodvoorraad kan aflewer. Klik hier om te sien waar dié punte geleë is.

Lees alle vorige berigte oor die Knysna-brand op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

30 Kommentare

jongste oudste gewildste
Alwyna Holtzhausen

Hoe het hierdie brande tegelyke tyd weerskante van Knysna onstaan???

Dries

E nuus het bevestig dit is brandstigting. Juis vir hierdie rede staan die wet nog dat n brandstigter geskiet mag word. Baie sterkte aan almal in Knysna en families en vriende met julle verlies

Marinda

Baie jammer om van U verlies te hoor. Sterkte aan julle almal.

m

As dit wel brandstigting is hoop Ek die gemors word vinnig uitgewys…..

Alida

Die skade is klaar aangerig. Waar begin mens as ALLES net n hopie as is? My hart bloei vir al daai mense.