80-jarige in Polokwane-aftreeoord vermoor

(Argieffoto)

Die polisie is op soek na die verdagtes betrokke by die “wrede moord” op ʼn 80-jarige inwoner van die Koraal-aftreeoord in Polokwane.

ʼn Vriend van Jacoba Grobler het Maandag omstreeks 11:00 op haar liggaam afgekom en die polisie ontbied.

“By hul aankoms daar het die polisie die oorledene op ʼn bed aangetref met oop wonde wat moontlik deur ʼn stomp voorwerp veroorsaak is. Haar skootrekenaar en selfoon word vermis,” het brig. Motlafela Mojapelo, polisiewoordvoerder, gesê.

Grobler het volgens die polisie alleen gewoon.

Lt.genl. Nneke Ledwaba, polisiehoof in Limpopo, het die moord ten sterkste veroordeel en gesê dit is gepleeg teen een van die samelewing se kwesbaarste lede. Ledwaba het opdrag gegee dat die polisie se 72 uur-aktiveringsplan in werking gestel word om die moordenaar of moordenaars op te spoor.

Enigiemand met inligting oor die voorval word gevra om brig. James Esbach te bel by 082 576 0743, of die polisie se Stop Misdaad-nommer by 08600 10111.

Die moord op Grobler volg kort nadat die moorde op Lizette Deacon (50) en haar ma, Hettie (79), die gemeenskap hier in rou gedompel het.

Lazarus Mahlo (41) en Sophie Mmako (51) het Maandag op twee aanklagte van moord en roof met verswarende omstandighede in verband met dié saak verskyn. Mmako het meer as 20 jaar vir die Deacons gewerk.

Lizette en Hettie se liggame is vroeër in hul motor langs die R37 by die Kuschke-afrit, buite Polokwane, gevind. Hulle is laatmiddag ontvoer nadat daar by hul meenthuis in Welgelegen ingebreek is. Albei vroue was vasgebind en het verskeie steekwonde gehad.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Magda

Dankie ANC nog n MOORD op julle voordeur – Baie sterkte aan familie en vriende

Elmarie

Ek het nie woorde om my afgryse in uit te spreek nie.

Jaco

Daar is n algemene verval van standaard in die land. En as jy kyk net na ons regering wat verwag n mens.

Fubar

Hoe weerloser, hoe meer geweld word gebruik, lyk dit my. Wat kan ‘n 80-jarige doen teen ‘n aanvaller? Cele, jy moes al lankal meer gedoen het om misdaad vas te vat. Hoeveel nog?

Termiet

DIT IS NIE DIE WERK VAN ‘N HONGER MENS NIE. DAAR IS ANDER MOTIEWE EN AGENDAS!