85-jarige erg getraumatiseerd ná aanval op plaas

Die deur waardeur die aanvaller toegang tot die huis verkry het. Foto: Verskaf

Toe ʼn plaasaanvaller op ʼn doodgewone Vrydagoggend ʼn vuurwapen in die 85-jarige Lena van As se gesig druk en vir haar sê, “Today is your last day”, was dit byna ʼn seën dat sy doof is en nie dié angswekkende woorde kon hoor nie.

Só sê Sarie Jansen van Vuuren nadat haar ma Vrydagoggend die slagoffer van nóg ʼn plaasaanval in Limpopo was.

Jansen van Vuuren vertel aan Maroela Media dat haar ma vir drie weke by haar en haar man op die plaas in die Modjadjiskloof-omgewing, voorheen bekend as Duiwelskloof, kom kuier het toe die voorval gebeur het. “My ma het omstreeks 08:45 die oggend gesit en televisie kyk. Sy is doof en maak staat op liplees om gesprekke te volg, so die televisie se klank was sag gestel,” sê Jansen van Vuuren.

Jansen van Vuuren was in dié tyd nie op die plaas nie en haar man, Pieter, was ongeveer 100 m weg van die huis besig om na die boerdery om te sien.

“Ons hou altyd die huis se deure gesluit, maar dié betrokke dag was die huishulp daar en die deur was dus oop sodat sy in en uit kon beweeg. Ons huishulp vertel sy was agter in die huis besig toe sy ouma se smeekstemmetjie uit die woonkamer hoor kom en ʼn manstem wat sy kon hoor nie my man se stem is nie.”

Van As het later gesê sy het uit die hoek van haar oog ʼn beweging by die voordeur opgemerk en gesien hoe ʼn hand met ʼn vuurwapen heen en weer beweeg. Die volgende oomblik het die aanvaller op haar afgestorm, haar uit haar stoel geruk en teen die vloer gestamp dat haar loopraam omval. Sy het probeer opstaan, waarna hy haar regop geruk en weer teen die vloer gestamp het.

“My ma is doof, maar sy kon aan sy lippe lees dat hy die woord ‘money’ sê. Sy het net vir hom gesê ‘please, please’, want sy kan ook nie juis Engels praat nie. Ons huishulp het in dié stadium om die hoek geloer om te kyk wat aangaan en gesien hoe hy die vuurwapen voor my ma se gesig hou en vir haar sê, ‘Today is your last day’.”

Die Jansen van Vuuren-egpaar se honde was in ʼn binnehof toegemaak omdat hulle aggressief teenoor vreemdelinge, onder wie die huishulp, is. “Ons huishulp het net besluit, vandag trotseer sy maar daardie honde, sy het geen ander keuse nie. Sy het ongesiens by ʼn deur by die binnehof uitgeglip en om hulp geskree. My man het die honde hoor blaf, haar hoor skree en dadelik na die huis gehardloop.”

In die 25 jaar wat die egpaar al op die plaas woon, het daar nog nooit so iets gebeur nie. Foto: Verskaf

Die huishulp se hulpkrete moes die aanvaller die skrik op die lyf gejaag het, want hy het vinnig laat spaander. Volgens Jansen van Vuuren het hulle eers later agtergekom dat hy in die proses ʼn kettingsaag gesteel het.

Pieter het dadelik hulp ontbied en na buite gehardloop om te kyk of hy die aanvaller sien, maar dié was teen daardie tyd skoonveld.

“Ek weet nie hoe dit moontlik is nie, maar my ma het geen beserings opgedoen nie – nie eens een gebreekte been of een kneusplek nie. Sy is natuurlik erg getraumatiseerd en sal berading moet ontvang. Pieter sukkel ook om te slaap ná die voorval – ek dink gisteraand was die eerste aand sedert Vrydag wat hy ʼn bietjie slaap ingekry het,” sê Jansen van Vuuren.

“Ek dink die feit dat ons huishulp nie op die aanvaller afgestorm het nie, maar eerder na buite gehardloop het om my man te roep, was ‘n bepalende faktor dat my moeder nie ernstig beseer is nie. Ons is haar baie dank verskuldig.”

Sy sê in die 25 jaar wat die egpaar al op die plaas woon, het daar nog nooit so iets gebeur nie, hoewel daar ongeveer ses weke gelede goed uit die huis gesteel is.

Volgens Jansen van Vuuren het verdagte goed op die plaas in die paar dae voor die aanval gebeur. Dinsdagaand ʼn stuk veld net buite die plaas aan die brand gesteek, maar die gras was so nat dat net ʼn klein stukkie gebrand het. Donderdag het die krag op twee geleenthede onverklaarbaar af gegaan en later weer aangegaan sonder dat hul bure enige kragonderbrekings ervaar het.

Jansen van Vuuren het gesê ʼn saak is by die polisie aanhangig gemaak. Maroela Media het navraag by die provinsiale polisiewoordvoerder gedoen en wag op terugvoer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Roelof

Is hierdie een van die 6 plaasaanvalle in die laaste 56 uur, of is dit ‘n bykomende een? Dankie

ferdi

Ses 6 aanvalle in 2dae se tyd dit sal ni ophou ni maak jul gereed vir nog meer

Petro

Voel so jammer vir die tannie..en hoop sy is ok. Maar moet stem. Diefwering… Hekke…ten minste?

Deloris

Ek wil skreeu skreeu…. ek wil huil huil en net aan hou huil en nog meer bid…Vader hou ons almal en ons boere veilig..

Anner Anton

Jy weet in Mexico noem hulle die plaashuis die hacienda. Die skure ens is met hoe heinings om die opstal gebou sodat n mens veilig na hul kan beweeg vanaf die hoofhuis. Die plaasvoorman bly binne die heining. Die opstal self waar die eienaar bly is omring met hoe mure. Binne hierdie laer kom geen gewone werker nie en dit is helder belig in die aand. Daar is nie bos om die area nie. Boere hier in ons land moet sekuriteit aanpas want die hienas is baie en die leeus min in hierdie tyd. Makliker gese as gedaan maar dit… Lees meer »