Soldate gedurende die destydse onluste in Gauteng. (Foto: GCIS)
Die 65 vermeende aanhitsers van die grootskaalse openbare geweld wat in 2021 in KwaZulu-Natal en Gauteng uitgebreek het, is ook nou van terreur aangekla.
Natasha Ramkisson-Kara, woordvoerder van die Nasionale Vervolgingsgesag (NVG) in KwaZulu-Natal, sê die verdagtes het Vrydag weer in die landdroshof in Durban verskyn, waar hulle nog aanklagte opgelê is.
“Benewens die aanklagte van sameswering om openbare geweld aan te hits en te pleeg, het die staat ook aanklagte van terrorisme, sedisie en sameswering om moord te pleeg by die klagstaat gevoeg,” sê sy.
Die saak is tot 30 Januarie uitgestel wanneer die verdagtes hul eerste verskyning in die Durbanse hooggeregshof sal maak.
Die landdroshof het ook die mans se borgtogvoorwaardes tot hul volgende verskyning verleng.
Die onluste in KwaZulu-Natal en Gauteng het twee jaar gelede uitgebreek nadat oudpres. Jacob Zuma in hegtenis geneem is. Skade van miljarde rande is aangerig met winkels wat geplunder en infrastruktuur wat beskadig is.
