Aanklagte teen Steve oor ‘rassistiese tirades’

Steve Hofmeyr (Foto: Janie Monsieur/Maroela Media)

Die ANC sal vandag strafregtelike aanklagte teen Steve Hofmeyr aanhangig maak omdat hy volgens dié party vir Zindzi Mandela-Hlongwane, Suid-Afrika se ambassadeur in Denemarke, en DA-LP Phumzile van Damme met die dood gedreig het.

“Steve Hofmeyr se rassistiese en onmenslike tirades op sosiale media getuig van barbaarsheid, wit heerskappy en giftige manlikheid,” het Pula Mabe, nasionale woordvoerder van die ANC, in ʼn verklaring gesê.

“Sy reeks sosialemediaplasings is minagtend teenoor Mandela-Hlongwane en Van Damme en hunker terug na die kru apartheidverlede – en dit is iets wat geen Suid-Afrikaner behoort te duld nie. Na ons mening is dit aanduidend van wit arrogansie en by uitstek ʼn kenmerkende voorbeeld van wit bevoorregting wat in die kiem gesmoor moet word.”

Steve Hofmeyr het Dinsdag (18 Junie 2019) dié twiet op Twitter geplaas. (Skermskoot: Twitter)

Hofmeyr se twiets wat die ANC so warm onder die kraag het, was in reaksie op ʼn reeks twiets van Mandela-Hlongwane wat die afgelope naweek ʼn storm op sosiale media ontketen het. Mandela-Hlongwane het Vrydag verskeie verdelende, rassistiese twiets op die sosialemediaplatform Twitter met die hutsmerk #OurLand geplaas. Sy het onder meer na wit mense verwys as lafaards en stelende verkragter-afstammelinge van Jan van Riebeeck. “Miss all these trembling white cowards, shem. Botha, Potgieter, Thieving Rapist descendants of Van Riebeck (sic),” lui die twiet.

Die DA, VF Plus en AfriForum het geëis dat daar daadwerklik teenoor Mandela-Hlongwane opgetree word en dat sy teruggeroep word na Suid-Afrika. Die EFF en BLF het op hul beurt haar twiets beaam en gesê hulle ondersteun haar uitlatings. “Geen Afrika-kind moet ooit onderdruk of selfs gedreig word dat hulle hul werk sal verloor omdat hulle die waarheid praat oor grond nie,” het Mbuyiseni Ndlozi, woordvoerder van die EFF, gesê.

Hofmeyr het op sy beurt aan Mandela-Hlongwane en Van Damme getwiet dat hy ʼn Suid-Afrikaanse belastingbetaler is en dus in werklikheid hulle “baas is”.

“Julle SAL spring wanneer ek so sê en julle SAL vra hoe hoog. En wanneer julle kom om ons lewe en grond te vat, SAL julle doodgaan. Ons kontrak is so eenvoudig soos dit. En moet dit nie vergeet nie,” het hy getwiet.

Mabe sê die ANC sal namens Mandela-Hlongwane ʼn klag van crimen injuria teen Hofmeyr aanhangig maak oor dié uitlatings. “Ons gemeenskappe moet sulke individue ontmasker vir wie hulle is en waarvoor hulle staan. Die ANC doen ʼn beroep op Suid-Afrikaners om mense wat voortgaan om rassisme in ons land aan te blaas, te isoleer,” het hy gesê.

Zindzi Mandela (Foto: Twitter)

“Die ANC het geen simpatie met rassiste nie en ons sal nie huiwer om hul gedrag by die owerhede aan te meld nie, ongeag hul openbare status. Rassiste het geen plek in ons demokratiese land nie.”

Die DA het teen vroeg vanoggend nog geen amptelike woord oor die saak gerep nie, maar Van Damme het aan News24 bevestig dat sy met ʼn regspan beraadslaag en ook klagtes teen Hofmeyr aanhangig sal maak. Sy het in ʼn reeks twiets op Twitter gesê sy kan nie stilbly wanneer sy deur rassiste aangeval word nie.

“Ek wens meer mense kon verstaan, of ten minste probeer verstaan, hoe emosioneel afbrekend dit is om aan rassisme onderwerp te word. Staan op en praat. Praat al bewe jou stem. Praat al moet jy dit deur trane doen. Moenie stilbly sodat ander gemaklik kan voel nie. Jou stem help om rassisme te beveg. Moenie bang wees om dit te gebruik omdat jy ongetwyfeld daaroor aangeval sal word nie. Moenie stilbly nie,” het sy getwiet.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

201 Kommentare

jongste oudste gewildste
Harry

Niemand gaan aan Steve vat nie.

GR

Ek is geen Hofmeyr ondersteuner nie maar die ANC wil nou kriminele klagtes teen hom le, maar Afriforum en VF+ vra dat Zindzi terug geroep word haal af julle handskoene en le ook ‘n klag teen haar haar twiets is erger as syne.

KaterinaKat

Ja ons wit mense verstaan presies hoe emosioneel afbrekend dit is om aan rassisme onderwerp te word. Nou al vir 25 jaar. Ons weet baie goed, Phumzile. Ons weet ook hoe dit voel om gehaat te word, met die dood gedreig te word, en te moet sien hoe ander mense van ons etnisiteit brutaal vermoor word oor hul velkleur. Ons weet hoe dit voel om nie werk te kan kry nie, oor ons velkleur. Vir 25 jaar al, Phumzile. So ons weet Baie goed, dankie.

Joe

Ek koop sommer nog ‘n Steve CD vandag!!!

Thys

Vat vyf !!!!!!