Aankoop van brandstof in kanne nou onwettig

(Argieffoto: pixabay)

Die departement van minerale hulpbronne en energie het Donderdag aangekondig dat die publiek nou nie meer brandstof in draagbare houers kan aankoop nie.

Dié regulasie is aangekondig ingevolge die Wet op Petroleumprodukte van 1977 en stipuleer dat die verkoop van petroleumprodukte in draagbare houers in kleinhandel vir die publiek verbied word.

Die regulasie sal in werking tree sodra dit in die Staatskoerant gepubliseer is. Dit is nie seker vir hoe lank die regulasie van krag sal wees nie.

Gwede Mantashe, minister van minerale hulpbronne en energie, het die aangekondig gemaak tydens ʼn vergadering met die Mynbouraad van Suid-Afrika (MCSA) en die Suid-Afrikaanse Petroleumraffinaderye (Sapref) nadat paniekbevange motoriste Woensdag tougestaan het by vulstasies. Berigte het die rondte gedoen dat die land brandstoftekorte kan ondervind weens die voortslepende geweld in KwaZulu-Natal en Gauteng.

Sapref het Woensdag in ʼn kennisgewing gesê dat hy nie sy bedrywighede in die lig van die oproer kan voortsit nie. Sapref is Suid-Afrika se grootste raffinadery en verskaf 35% van die land se brandstof aan handelaars.

Mantashe het die publiek egter verseker dat hoewel daar uitdagings is om petroleumprodukte na sommige dele van die land te vervoer, daar genoegsame voorraad is om in die vraag na brandstof te voldoen.

“Die regering werk ook daaraan om die vervoer van petroleumprodukte te beveilig.”

Maroela Media het vroeër berig dat vragmotors dalk binnekort op die N3 begelei sal word om allerlei produkte aan die res van die land te verskaf.

“Die departement moedig die mynbou- en energiesektor aan om standvastig te bly en die veiligheid van hul bedrywighede en personeel te verseker. Ons sal voortgaan om in gesprek te tree met belangegroepe in dié sektor. Saam kan ons baie bereik en vorentoe beweeg,” het Mantashe gesê.

Intussen het Layton Beard, woordvoerder van die Automobiel-Assosiasie (AA), Donderdag aan Maroela Media gesê dat die vereniging die standpunt steun dat mense in hierdie tyd slegs die hoeveelheid brandstof moet koop wat hulle benodig.

Hy sê egter dat daar uitsonderlike gevalle is waar brandstof wat in draagbare houers gekoop word, lewensbelangrik is.

“Wat gebeur as jy brandstof benodig vir ʼn kragopwekker sodat ʼn suurstofmasjien wat iemand aan die lewe hou, kan werk? En as jy langs die pad gaan staan sonder brandstof? Wat doen ʼn mens dan?”

Hy sê die organisasie gaan die departement nader vir duidelikheid oor die wet.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

54 Kommentare

jongste oudste gewildste
Rudolf

Wat van vir besigheidsdoeleindes soos `n tuindienste ?

Corne123

geen grasny nie geen generator nie hulle mal man sal nooit week nie hoekom mag ons jie kapsie aanteken nie

Johan

En die Diktatorskap slaan weer toe. Dankie aan al die getroue covid regulasie ondersteuners, julle het nou n lekker lat vir ons gepluk. Al die probleme kan nou maklik met n paar ondeurdagte regulasies opgelos word…

Chef

ek kan regtig nie verstaan watter verskil dit sal maak nie.

Andre

So moet ek nou maar in die ry gaan staan by die garage met my grasmasjien?? Die mense dink nie voor hulle sommer net reëls instel nie.