Aansoek gebring om staking by banke te keer

Foto: Absa Groep

Die bankwerkersvakbond Sasbo sê hy gaan voort met Vrydag se beplande staking en protesaksie teen werksverliese in die banksektor ten spyte van ʼn hofaansoek wat dit wil stuit.

Sasbo, tesame met Cosatu, beoog om die bankwese in die land tot stilstand te bring, maar Business Unity South Africa (Busa), wat die banke verteenwoordig, het ʼn dringende aansoek om ʼn interdik gebring om die protesaksie in sy spore te stuit. Busa voer aan dat die protes onwettig en onbeskermd is en dat Sasbo en Cosatu hul artikel 77-kennisgewing moet onttrek.

Sasbo beplan vyf landswye protesoptogte, naamlik in Johannesburg, Durban, Bloemfontein, Port Elizabeth en Kaapstad, vir 27 September om beswaar te maak teen onlangse grootskaalse afleggings wat in die bankwese plaasvind as gevolg van digitalisering.

“Verbruikers word aangemoedig om van mobiele bankdienste gebruik te maak in plaas daarvan om na hulle plaaslike tak toe te gaan,” het Joe Kokela, hoofsekretaris van Sasbo, in ʼn verklaring gesê.

Standard Bank het in Maart vanjaar aangekondig dat dit 1 200 werkers gaan afdank en 91 van sy takke gaan toegemaak, terwyl Nedbank ook planne bekendgemaak het om 3 000 werkers af te lê. Absa het ook in daardie maand gesê dat hy 870 werkers sou afdank.

“Gegewe die hoë werkloosheidsyfer in die land, gepaard met die swak ekonomie, die ontwrigting wat die vierde industriële revolusie tot gevolg het en die groot sosiale impak wat dit gaan hê, kan ons nie bekostig om nog verdere werk te verloor nie,” het Kokela bygevoeg.

Die vakbond, met 70 000 lede, wil ook meer duidelikheid hê oor hoe Suid-Afrikaanse banke die vierde industriële revolusie gaan hanteer.

Die Suid-Afrikaanse Inkomstediens het verbruikers intussen gewaarsku dat die staking moontlik ʼn uitwerking op belastingterugbetalings kan hê. “Ons moedig belastingbetalers aan om hulle betalings dus twee besigheidsdae vooruit af te handel,” het dit in ʼn verklaring gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

31 Kommentare

jongste oudste gewildste
Ore

Het SASBO uiteindelik tande gekry?

Johan

Kan mens dit glo!!! die Regeering (SARS) se eerste prioriteit is hul belasting inkomste en nie die mense wat afhanklik is van die bank sector nie!!!!

Klopjag

Unies soos SASBO staan onder die hoenderstellasies en kla dan as daar op hulle koppe gemis word.

Dit is wat gebeur as jy jou mense leer om te staak in plaas daarvan om hulself te verbeter en op die toekoms voor te berei.

Jammer vir die mense wat julle werk verloor. Maar my vraag is, wat het julle gedoen om relevant te bly?

Anel

En ho wil hulle in diens bly en betaal word as daar nie werk is nie? En wat het hulle gedink gaan gebeur as alles automatiseer?

marous

Die grootste revolusie is om die draai … om by die miljoene soos diere te vrek as gevolg van honger en dors . Glo dit maar .