‘Aanstootlike’ Google Doodle verwyder

Die Google Doodle wat sosialemediagebruikers warm onder die kraag het. (Foto: Twitter)

Google Suid-Afrika moes Maandag vure doodslaan oor sy Google Doodle ter viering van Vryheidsdag. Dié simboliese springbok omring deur die kleure van die Suid-Afrikaanse vlag is noodgedwonge verwyder nadat dit deur sosialemediagebruikers as onvanpas en ’n simbool van apartheid bestempel is.

Google het die springbok as Suid-Afrika se nasionale dier met ’n agtergrond van rooi, groen en blou in die prent uitgebeeld. Die beeld het egter wyd reaksie op sosiale media ontlok.

“Google se Vryheidsdag-prent werk nie vir my nie. Lyk te apartheidrig met die springbok en die driestreepvlag. Hulle kon iets baie beter geskep het,” het een sosialemediagebruiker op Twitter laat weet.

“Google Doodle het ’n springbok vir Vryheidsdag. Dit is nie waarvoor ons mense doodgegaan het nie,” lui nog ’n twiet.

Google Suid-Afrika het die prent binne ure verwyder en ’n verskoning op sosiale media geplaas. “Ons verstaan ​​dat ons #GoogleDoodle vir Suid-Afrika se Vryheidsdag sommige mense aanstoot gee. Ons moes beter gevaar het en is baie jammer. Ons het dit afgehaal. Gelukkige Vryheidsdag!” lui die twiet.

Sommige gebruikers het die besluit verwelkom terwyl ander kopkrap oor hoe die doodle aanstoot kon gee.

“My eerste gedagte toe ek die Google Doodle gesien het, was dat dit cool is. My tweede gedagte was dat dit die verkeerde beeld was om te gebruik. Ek is bly Google het sy fout vinnig besef en om verskoning gevra,” het nog ’n sosialemediagebruiker later op Facebook gesê.

“Ek is verward. Wat was so beledigend aan die Google Doodle ter viering van Vryheidsdag?” wou een sosialemediagebruiker weet.

“Ek dink dit vier ’n nasie met soveel potensiaal solank ons leierskap het wat ons in dieselfde rigting trek,” het ’n ander getwiet.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

60 Kommentare

jongste oudste gewildste
Daniel

Foeitog, so sensitief, word net groot! Die hele wereld moet ligloop om nie sekere mensies aanstoot te gee nie!

Andre

Hoekom ? Wat sou die mense verkies ? Is daar ‘n simbool of wapen wat almal gelukkig sal maak ?

Yvonne

Pot strooi! En dan kan ek nou maar seker as vrou aanstoot neem dat dit nie ‘n bokooi is nie! Die kleinserigheid oor alles is net verregaande. Gaan loop maak eerder vir iemand ‘n gratis masker.. Of iets. Maar hou tog net op met teem! Ek is so vreeslik siek en sat vir al die politieke korrekte ‘oortredings’ waarvoor mens moet oppas. Dis ‘n mynveld!

Tino

Daar is darem nie pille nie

Eerlik

Ag regtig!!! Ek het gedink dit was baie besonders!Baie dankie Google!!