Aanvallers skiet boer met sy eie vuurwapen

Argieffoto: Reint Dykema

Argieffoto: Reint Dykema

ʼn Boer van die Edenburg-distrik in die Vrystaat is Woensdagoggend deur twee booswigte, wat hom op sy plaas ingewag het, geskiet.

Johannes Coetzee (36), ʼn boer van die omgewing wat ook ʼn sake-onderneming op die dorp besit, is op sy plaas De Erf oorval. Konst. Peter Kareli, woordvoerder van die polisie, het die voorval aan Maroela Media bevestig.

“Coetzee het by die huis stilgehou toe die twee aanvallers op hom afgestorm en op hom losgebrand het,” het hy gesê. “Coetzee kon daarin slaag om agter sy bakkie in te duik en is net een keer, in die linkerskouer, gewond. Die twee aanvallers het op die vlug geslaan.”

Volgens Kareli het Coetzee na die plaaslike polisiestasie gery om die aanval aan te meld voordat ʼn ambulans hom van die polisiestasie na ʼn hospitaal vervoer het. “Die polisie het vinnig gereageer en na die plaas gejaag. Hulle het ook ʼn polisiehelikopter en die landelike buurtwag geaktiveer om te help om die verdagtes agterna te sit,” het hy gesê.

Die polisie kon daarin slaag om een van die verdagtes, ʼn man in sy laat 20’s, in hegtenis te neem. Die tweede verdagte is nog op vrye voet.

Dit het later aan die lig gekom dat die verdagtes by Coetzee se huis ingebreek het voordat hy op die plaas aangekom het. Die hele huis was omgekeer, maar slegs sy vuurwapen is gesteel. Dit is ook die vuurwapen wat die aanvallers gebruik het om hom te skiet.

“Die verdagte sal binnekort in die hof verskyn op aanklag van poging tot moord,” het Kareli gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

21 Kommentare

jongste oudste gewildste
Vra maar net

Is die boer nie gearrestree om dat hy met syeie vuurwappen aangeval is nie?
Hy is mos skuldig aan swak wapen sorg?

Nerine

Baie dankie aan konst. Kareli en ander polisiemanne asook die landelike buurtwag wat so vinnig reageer het. Die gemeenskap waardeer dit. Sterkte aan Johannes Coetzee. Hoop jy is spoedig weer op die been.

Hendrik

My ouma was jare telefoniste op Edenburg. Anna van Biljon. Ek het baie daar gekuier en al die boere verdien ‘n veilige hawe om kos te produseer vir SA.

wilma

Wat gaan nou met die man gbeur wat gvang is geen borgtog asb soek die 1 tot hy gekry word

Michael

Hoekom was die boer nalatig met sy vuurwapen??