Aardbewing skud KZN-kus

Swembaddens op Durban se strand Foto: bugbog.com

Swembaddens op Durban se strand Foto: bugbog.com

ʼn Aardbewing wat Saterdagoggend in KwaZulu-Natal se kusgebiede gevoel is, was onwaarskynlik groter as 3.0, het die Raad vir Geowetenskap gesê.

“Ons sal ongelukkig eers Maandag die ligging en omvang kan bevestig,” het seismoloog Michelle Grobbelaar aan ANA gesê. “Maar dit wil voorkom of die aardbewing in die KwaZulu-Natalse streek voorgekom het en wyd oor die provinsie gevoel is.”

Die aardbewing is vanoggend omstreeks 11:30 gevoel en het ʼn paar sekondes lank voortgeduur. “Dit is onwaarskynlik dat dit groter as 3.0 was, maar dit moet bevestig word,” het sy bygevoeg.

Grobbelaar het gesê daar was al vantevore aardbewings in die provinsie, die vroegste aantekening op die raad se rekords is in 1932 naby St Lucia. “Mens hoef dus nie besorg te wees nie, maar net bewus wees van hoe om op sulke voorvalle te reageer,” het sy gesê.

Duisende mense het op Facebook en Twitter berig hulle het die bewing tot so ver suid as Margate in die suide en Richardsbaai in die noorde gevoel, en tot so ver in die binneland as Pietermaritzburg.

Daar was nie dadelik enige berigte van skade ná die aardbewing nie.

Robert McKenzie, woordvoerder van die provinsiale nooddienste, het gesê volgens hul inligting is die aardbewing van Stanger tot Port Shepstone en Pietermaritzburg gevoel.

Derek van Dam, meteoroloog by CNN en CNN International het intussen bevestig die aardbewing in KwaZulu-Natal was nie ‘n náskok van die aardbewing van 6.4 in Taiwan waartydens minstens 13 mense reeds omgekom het nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

6 Kommentare

Oom Koos ·

Watter aardbewing praat julle van? Ek het gedink dis my maag wat so tekere gaan.

Peet J ·

Liewe Heksie met alle respek gesê verander asseblief jou skuilnaam want dit pas nie by jou geloof uitsprake nie.

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.