Aardskudding in Gauteng, Noordwes

Die aardskudding was ongeveer 41km vanaf Potchefstroom gesentreer (3 April 2017). Grafika: United States Geological Survey

Inwoners van onder meer Potchefstroom, Orkney, Klerksdorp, Johannesburg en Pretoria is Maandagoggend deur ʼn aardskudding wakker gemaak.

Volgens die United States Geological Survey (USGS) het die skudding, met ʼn magnitude van 5.2 om 05:08 voorgekom en ʼn paar sekondes geduur. Dit was naby Stilfontein en ongeveer 41 km vanaf Potchefstroom gesentreer en kon in verskeie dorpe, onder meer Orkney, Klerksdorp, Viljoenskroon en Johannesburg gevoel word.

ʼn Maroela Media-leser in Potchefstroom het Maandagoggend gesê hy het net na 05:00 wakker geskrik van die bed wat ruk en die stortdeur wat skud. “Dit het met ʼn oordonderende geraas gepaardgegaan, amper soos iets wat uitmekaar ruk. Ek is nie seker hoe lank dit geduur het nie, maar dit het vir my gevoel asof daar twee kort skuddings kort na mekaar was,” het hy gesê.

Die gebied is bekend daarvoor dat aardskuddings soms weens mynbedrywighede daar voorkom, maar dit is nog nie duidelik of dit die oorsaak van die skudding was nie.

Op sosiale media het talle mense oor die aardskudding gegons. Inwoners in Pretoria en Centurion het ook aangedui dat hulle die aardskudding gevoel het. Sommige het beskryf dit het geklink “soos klippe wat op die dak val” en dat hekke en deure geskud het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

52 Kommentare

jongste oudste gewildste
Audrey bierman

My teels het afgeval in Orkney

Jean

Net so. Ons het hom in Rustenburg ook gevoel!

Thelma du Plessis

Ook in Rustenburg gevoel

snipez

hardloop zuma. daar is Een groter as jy.

hessie

Sjoe dit was erg! Ons bly tussen Orkney en Potch. Ek het rerig vir n oomblik gedink ons dubbelverdieping huis gaan nou n enkelverdieping word. Dit het gevoel asof die boonste verdieping heen en weer beweeg!