‘Aborsiedokter’ verskyn in hof

Abubakari Kaweesa. Foto: Verskaf

ʼn 46-jarige man wat hom as ʼn dokter voorgedoen en in hegtenis geneem is nadat hy op heter daad betrap is terwyl hy glo ʼn onwettige aborsie uitgevoer het, het Woensdag in die hof verskyn.

Kapt. Dineo Lucy Sekgotodi, woordvoerder van die Valke in Mpumalanga, het gesê die beskuldigde, Abubakari Kaweesa, het in die Malelane-landdroshof verskyn op aanklagte wat verband hou met die oortreding van die Wet op Gesondheidsberoepe, die Wet op Keuse oor die Beëindiging van Swangerskap en die Medisynewet.

Die saak is tot 18 Oktober uitgestel vir nadere ondersoek. Hy bly in aanhouding.

Kaweesa is Dinsdag in Mbombela (Nelspruit) in hegtenis geneem in verband met beweerde bedrog en die uitvoer van onwettige aborsies.

ʼn Ondersoek het begin nadat daar klagtes ontvang is oor ’n man wat hom as ʼn dokter voordoen en ʼn onwettige chirurgiefasiliteit in Malelane bedryf het.

“Dit het tydens die ondersoek aan die lig gekom dat die man nie geregistreer is nie en dus onwettig praktiseer. Hy het tradisionele medisyne en aborsietablette gebruik,” het Sekgotodi ná die man se inhegtenisneming gesê.

Die beskuldigde is volgens Sekgotodi in hegtenis geneem terwyl hy glo nóg ʼn onwettige aborsie uitgevoer het. Die kliënt het glo R700 vir dié diens betaal.

Een van die ‘dokter’ se advertensies. Foto: Verskaf

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

6 Kommentare

jongste oudste gewildste
Maria Van Dieweeck

“DROP PREGNANCY PROBLEMS” Vreesaanjaend!

Hanna

Hoe kan mense in vandag se dae nog vir sulke slenters val. Wat van n bietjie common sense? Hierdie aborsie-pille word natuurlik uit ons staatshospitale gesteel. Liewe genugtig!

Elma

Skrikwekkend!!!! Sluit hom toe en gooi sleutel weg.

Swannie

Die Staat het ook `n aandeel aan sulke vergrype. Hul laat ooglopend toe dat mense wat geen kwalifikasies het, oop en bloot adverteer dat hulle “Dokters”is.

In my dorp is daar al tot “Professore” wat ook so adverteer.

Openlik bedrog, maar niemand gee om nie.

jee

marie Stopes
R1850.00
Professioneel en met deernis.