Adam Catzavelos oor video: ‘Ek voel absolute skaamte’

Adam Catzavelos. Foto: ‘n Skermskoot uit die video.

Adam Catzavelos, die man wat vandeesweek aan die ontvangkant van ʼn stortvloed kritiek was nadat ʼn video aan die lig gekom het waarin hy die k-woord gebruik, sê hy voel “absolute skaamte” oor die video.

“Dit is moeilik om in woorde om te sit wat ek wil sê en opreg om verskoning te vra. Ek was onbesonne en onsensitief en het ʼn totale gebrek aan begrip getoon vir wat die mense van ons nasie deurgemaak het. Ek het so baie van my mense beledig. Ek is nie trots daarop nie.”

Catzavelos het die verskoning in ʼn geskrewe verklaring gemaak wat op sosiale media versprei is. EWN berig Catzavelos se familie het bevestig dat die verklaring wel eg is en werklik van hom af kom.

In die verklaring sê Catzavelos hy besef dat die video “ondenkbare pyn” vir elke mens in Suid-Afrika veroorsaak het en dat dit erge skade aangerig het aan ʼn land wat reeds desperaat probeer om rassespanning te genees. “Ek verwag nie dat mense my moet vergewe nie, maar ek sal die res van my lewe berou hê en probeer opmaak vir my totale gebrek aan respek en oordeel.”

Hy sê verder dat dit belangrik is vir mense om te besef dat dié video nie gesien moet word as ʼn weerspieëling van ander mense in Suid-Afrika se sienings nie. “So baie mense het hul liefde en tyd ingesit om Suid-Afrika te genees en mense soos ek wat dom goed sê en doen, maak dit moeilik vir Suid-Afrika om vorentoe te beweeg,” lui die verklaring.

“Ek kan net hoop dat die positiewe gevolge hiervan die stemme is wat verenig staan teen my uitsprake. Ek vra onvoorwaardelik om verskoning vir die skade en seer wat ek veroorsaak het. Aan my familie, my ma, pa, vrou, broer en susters en my kinders, wat die wêreld vir my beteken, ek is so, so jammer.”

Maroela Media het vroeër berig Catzavelos kan op die video gesien word hoe hy op ʼn strand by sy vakansiebestemming stap en homself met sy selfoon afneem. “Ek gaan nou vir jou ʼn weervoorspelling gee: blou lug, pragtige baaie, ongelooflike see, en nie een k****r in sig nie. F****n hemel op aarde. Jy kan dit nie klop nie – jy kán dit nie klop nie,” sê hy in die video.

Die gewraakte uitsprake het verreikende gevolge vir Catzavelos ingehou wat nie net sy werk en aandele in die familiebesigheid St. George’s Fine Foods kwyt is nie, maar ook nou deur ʼn strafregtelike aanklag in die gesig gestaar word. Die Menseregtekommissie (MRK) het ook ʼn ondersoek na die video van stapel gestuur en Catzavelos is verbied om die perseel te betree van die spogskool in Johannesburg waar sy kinders skoolgaan.

St. George’s Fine Foods het ook deurgeloop oor die video met restaurantkettings, waaronder Braza en The Baron, wat hul sakebande met die onderneming beëindig het. Die sportmaatskappy Nike moes ook dié week van hul winkels tydelik sluit uit vrees vir personeel se veiligheid aangesien Catzavelos se vrou vir dié maatskappy werk.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

34 Kommentare

jongste oudste gewildste
Pieter

Moet nie te sleg voel oor wat jy gesê het nie, jy is net menslik

Corne

Mense. Dink vóór jul praat of tik groot asb.

Erica

Ek is bly het hy verskoning gevra, sy aksies was roekeloos en ondeurdag. Ek sukkel egter nog om te verstaan hoekom ek so baie haat en dreigemente van ander nasies teenoor blankes op sosiale media sien maar geen haan kraai daarna. Waar is die “dame” wat die blanke polisie en metro so sleggesê het – hoekom lees ons niks van daardie saak. Almal moet dieselfde behandel word. Hoe kan ‘n mens trots wees daarop om iemand te vervolg maar jou blind hou vir presies dieselfde oortredinge van ander.

Trish

Don’t judge, dis hoe ek groot gemaak is.
Ek het my skool jare van Hoêrskool in Kwazulu Natal klaar gemaak en ekt baie vriende van alle rasse gehad. n Mens respekteer mekaar. Maak nie saak wat nie. Moenie mekaar sleg se of intimideer nie. Dit maak jou nie n beter mens nie

Petra Etsebeth

Spyt is ‘n goeie ding maar kom altyd te laat, ne…. Dit het nou al soveel keer gebeur, ‘n mens kan eintlik nie meer die verskonings aanvaar nie. Almal wil iets negatiefs sê en later dan net ‘n verskoning uitreik. maklik ne, en dan is daar ander wat in die tronk beland. ????????