Boitumelo Moloi, adjunkminister van arbeid, is vandeesweek in die hospitaal opgeneem nadat sy positief getoets het vir Covid-19.
Phumla Williams, woordvoerder van die kabinet, sê in ’n verklaring Moloi is Dinsdag in die hospitaal opgeneem nadat sy begin sleg voel het. Sy het Woensdag haar toetsuitslae ontvang.
“Adjunkminister Moloi bly in die hospitaal, sy herstel goed en is vol vertroue dat sy die virus sal oorkom. Alle lede van die adjunkminister se kantoor wat met haar in aanraking gekom het, sal hulself afsonder,” het Williams gesê.
Obed Bapela, die adjunkminister van samewerkende regering en tradisionele sake, het intussen ook positief getoets vir die koronavirus.
Volgens Williams het Bapelo hom vandeesweek vir die vierde keer sedert die uitbreking van Covid-19-pandemie laat toets nadat hy sommige simptome begin toon het.
Die adjunkminister het sy toetsuitslae Saterdag ontvang en is tans in selfisolasie.
Williams doen ’n beroep op Suid-Afrikaners om hul hande gereeld te was, maskers te dra en sosiale afstand te handhaaf om hulle en hul geliefdes sodoende teen die koronavirus te beskerm.