Afdanking oor inenting was regverdig – KVBA

Argieffoto ter illustrasie. (Foto: GCIS)

Die Kommissie vir Versoening, Bemiddeling en Arbitrasie (KVBA) het bevind dat ʼn maatskappy wat ʼn vrou afgedank het omdat sy geweier het om teen Covid-19 ingeënt te word, regverdig opgetree het. Daarvolgens is haar afdanking bekragtig.

In ʼn arbitrasietoekenning wat op 21 Januarie gemaak is, het Lungile Matshaka, die kommissaris van KVBA, beslis dat Theresa Mulderij se afdanking deur die Goldrush-groep “wesenlik regverdig” was.

Mulderij het die maatskappy KVBA toe gesleep omdat sy die regverdigheid van haar afdanking bevraagteken. As vergoeding het sy ʼn heraanstelling of maksimum vergoeding geëis.

Mulderij was sedert 2018 in diens van die maatskappy as ʼn opleidings- en sakeverwante beampte en is in Oktober afgedank.

Luidens die arbitrasietoekenning het die maatskappy se uitvoerende komitee verlede jaar ten gunste van ʼn verpligte inentingsbeleid gestem. Voordat die beleid ingestel is, het die bestuur van die maatskappy oor die bestek van drie maande met werkers en hul vakbonde beraadslaag.

“Die werkers het die ontvangs van die verpligte beleid bevestig, asook dat dit aan hulle verduidelik is en dat hulle dit gelees het. Werknemers is ook die geleentheid gegun om aansoek om vrystelling te doen. Die maatskappy het aangedui dat die inentingsbeleid ingestel is om werkers se gesondheid te beskerm,” lui die arbitrasietoekenning.

Volgens die toekenning het Mulderij egter besluit om nie aan hierdie beleid te voldoen nie, aangesien sy nie van plan was om teen Covid-19 ingeënt te word nie. Haar dokter het ook geweier om haar medies ongeskik te verklaar.

Sy is op 28 Oktober elektronies dissiplinêr verhoor en gevolglik afgedank. Dit is oor dié bevinding dat Mulderij haar tot die KVBA gewend het.

Mulderij het in haar getuienis aangevoer dat dit haar grondwetlike mensereg is om die inenting te weier. Sy het ook aangedui dat sy sosiale en emosionele druk ervaar het om tussen die entstof en haar werk te kies.

Na aanleiding van getuienis wat voor die kommissaris gedien het, het Matshaka egter bevind dat Mulderij permanent onbevoeg is op grond van haar besluit om nie ingeënt te word nie en dat sy ook weier om te help om ʼn veilige werksomgewing te skep.

“Mulderij se werk is om met kliënte én medewerkers om te gaan en is van só ʼn aard dat sy nie na ʼn ander pos geskuif kan word nie,” lui die bevinding.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

72 Kommentare

jongste oudste gewildste
AW

Ja Nee !!

Simoné

Soveel vir mense regte dan…

Marius

Die inentingsbeleid is ingestel om die werkernemers se gesondheid te beskerm ? Regtig ? Ek sal eerder sê die maatskappy gee niks vir sy werkers om nie en die ccma ook nie.

Shakespeare

Watse etniese groep is Mulderiji ? Never heard of this surname in my life.

Pieter

Hierdie gaan nog lelik backfire…