AfriForum bekommerd oor ‘brigades’ in skole

Argieffoto ter illustrasie (Foto: Unsplash)

Die burgerregteorganisasie AfriForum het Dinsdag gesê hy is bekommerd oor ʼn advertensie deur die Gautengse departement van onderwys waarin poste adverteer word vir jong werklose jeug tussen die ouderdomme van 18 en 35 jaar om as lede van Covid-19-brigades opgelei te word.

Volgens die advertensie sal die brigades by skole ontplooi word om die departement in die uitvoer van sekere take te ondersteun.

Of skole enige sê in dié ontplooiing sal hê, word nie genoem nie, wys Henk Maree, woordvoerder vir AfriForum, daarop.

Volgens Maree word die spesifieke rol en magte van die brigades nie duidelik in die advertensie gestipuleer nie. “Dit sou sinvoller wees as die departement met skole in gesprek getree het sodat skole self kan besluit of hulle van die brigades gebruik wil maak. Talle skole het aktiewe ouer- en gemeenskapsbetrokkenheid en só ’n rol kan vanuit die gemeenskap self gevul word,” verduidelik hy.

Maree voeg by dat veiligheidsmagte soos die Suid-Afrikaanse Nasionale Weermag (SANW) en die Suid-Afrikaanse Polisiediens (SAPD) wat veronderstel is om opgelei te wees vir krisisse soos dié, tans weens verskeie voorvalle wyd gekritiseer word vir hul swak en onbevoegde optrede.

Die advertensie deur die Gautengse departement van onderwys.

“Dit laat die vraag ontstaan hoe enkele weke se opleiding lede van dié brigades voldoende voorberei om nie ook buite hul magte op te tree nie, veral in weerlose omgewings soos skoolgemeenskappe.”

Volgens Maree is AfriForum ook bekommerd oor die militaristiese ondertoon wat deur die term “brigade” geskep word. “Die term is onrusbarend, veral aangesien geen ouer sy kind in ’n militaristiese omgewing wil plaas waar die brigade kortstondig opgelei word en in sommige gevalle slegs enkele jare ouer is as die kind nie.”

Luidens die verklaring het skole reeds baie goed gereguleerde gesagstrukture. “Enige inmenging van addisionele strukture wat direk deur die provinsiale owerhede gemagtig word om onder meer inligting in te samel en veiligheidsmaatreëls te moniteer, skep die geleentheid vir magsmisbruik en onnodige inmenging in dié opsig,” meen Maree.

Volgens AfriForum behoort skoolgemeenskappe te kan kies of hulle van die departement se hulp gebruik wil maak. “Waar skole nie aan dié brigades toegang tot hulle terreine, personeel en leerders wil toestaan nie, moet dié keuse gerespekteer word.”

Indien dit nie die geval is nie, sal AfriForum beheerliggame met regsadvies bystaan, verseker Maree.

Maroela Media het vroeër berig Angie Motshekga, die minister van basiese onderwys, het Dinsdagaand bevestig dat skole op 1 Junie vir gr. 7’s en gr. 12’s sal heropen. Geen aanduiding is egter gegee oor wanneer leerders van ander grade of kinders in kleuterskole en dagsorgsentrums sal kan terugkeer nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

38 Kommentare

jongste oudste gewildste
Eerlik

Sjoe, maar ons het baie geld om te mors.

Karlahari

Unemployed youth 18 to 35…..
In my boek is youth so van 16 to maks 24 jaar oud.
Skole en kinders word alreeds geteiken deur skelms. Gaan daar agtergrond inligting oor al die aansoekers gedoen word veral na al die wat op parool gaan uitkom?
Die brigade pas by die beeld van daai ander zulu se beret.
Die brigades het maar gesukkel in Angola.

Toktokkie

Ek stem saam! Was ook bekommerd toe ek dit lees.

PH

Brigades.
Gaan hulle kamoefleer klere dra as hulle opgevoede kinders moet “dissiplineer”?
Nou sal die skole seker sekuriteit moet aanstel om moontlike diefstal en ander bose oortredings te voorkom?

“Drug lords” gaan mos nou ‘n goeie geleentheid sien om verspreiders in skole te werf?

Sarel

Alweer Daai Ou.