AfriForum Jeug: “Rassisme ontstel wit Tukkies-studente”

Argieffoto: Universiteit van Pretoria

Argieffoto: Universiteit van Pretoria

AfriForum Jeug het ʼn dringende beroep op die bestuur van die Universiteit van Pretoria (UP) gedoen om ondersoek in te stel na bewerings dat swart studente uitlatings en dreigemente teenoor wit studente geuiter het.

Volgens AfriForum Jeug het twee ongeïdentifiseerde swart studente van Kollege Tehuis rassistiese uitlatings en dreigemente teenoor wit studente by die hekke van die Taaibos-koshuis geuiter. Die voorval het glo die aand van 4 September plaasgevind.

“Die een student het wit studente gevloek, en geskree dat hy wit mense haat en dat hy al die wit mense wil doodmaak. Dié verbale aanval het Taaibos-studente diep ontstel,” het Emuel Venter, ʼn Taaibos-inwoner, gesê.

“Hierdie aanval bewys weereens alle rasse word geraak deur rassisme. AfriForum Jeug eis dat die universiteit dissiplinêre stappe eenvormig toepas in alle rassisme-verwante insidente. Dit moet dringend deur die UP aangespreek word,” het Monique du Randt, woordvoerder van AfriForum Jeug, gesê.

Du Randt het gesê UP-sekuriteit is besig om die video-opnames van sekuriteitkameras by die hek asook data van die sekuriteitshekke na te gaan. “Die aanvallers sal binnekort geïdentifiseer word. Sewe inwoners van Taaibos is as getuies geïdentifiseer,” het Du Randt gesê.

Maroela Media het UP om kommentaar genader en wag vir terugvoer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae