‘AfriForum sal verpligte inentings teenstaan’

Argieffoto (Foto: Unsplash)

Die burgerregteorganisasie AfriForum sê in ʼn brief aan pres. Cyril Ramaphosa dat hy enige verpligte inentingsmandaat wat deur die regering ingestel sal word, sal teenstaan omdat dit inbreuk maak op mense se regte.

Dit volg nadat Ramaphosa Sondagaand aangekondig het dat die regering ʼn taakspan aangewys het om te beraadslaag oor die moontlikheid van verpligte Covid-19-inentings vir sekere aktiwiteite en plekke.

Hierdie span sal aanbevelings aan die kabinet doen oor ʼn regverdige en volhoubare benadering tot entstofmandate.

Ramaphosa het Suid-Afrikaners in Februarie verseker dat niemand gedwing sal word om teen Covid-19 ingeënt te word nie. Hy het ook gesê dat niemand verbied sal word om te reis of sekere ruimtes te betree indien hulle nie ten volle teen die virus ingeënt is nie.

“Nou beplan Ramaphosa se administrasie om presies dít te doen. Dit is uiters kommerwekkend dat die president skielik sy besluit omkeer,” sê Ernst Roets, hoof van beleid en aksie by AfriForum.

Ramaphosa het wel in sy toespraak Sondag erken dat die besluit om ʼn mandaat soos dié in te stel, ʼn moeilike een is.

“Ons besef dat die instelling van hierdie soort maatreëls ʼn baie moeilike en ingewikkelde kwessie is, maar as ons dit nie ernstig en dringend bespreek nie, sal ons kwesbaar bly vir nuwe variante en sal ons nuwe vlae van die pandemie bly beleef,” het hy gesê.

Volgens AfriForum is daar egter internasionaal voorbeelde beskikbaar wat wys dat wanneer inentings verpligtend gemaak word, dit dikwels misluk en dat die teenoorgestelde bereik word as wat aanvanklik daarmee bedoel is.

“Hoewel AfriForum ten gunste is van vrywillige inentings, maak verpligte inentings inbreuk op die beginsel van vryheid van keuse en mense se grondwetlike reg op liggaamlike outonomie,” sê Roets.

“AfriForum sal die nodige stappe doen om die regering teen te staan indien hy inenting verpligtend wil maak.”

Roets meen indien mense die staat steun oor verpligte inentings, open dit net die deur vir die staat om in die toekoms iets op burgers af te dwing wat geheel en al onaanvaarbaar is.

“Staatsdwang bly gevaarlik, ongeag wat die onderwerp is en ons moenie die staat toestemming gee om dit in ʼn verskeidenheid van situasies, anders as dié een, te gebruik nie. Verpligte inentingsmandate is onregverdig in ʼn vrye samelewing,” sê hy.

Verskeie politieke partye het sedert Ramaphosa se aankondiging ook hul kommer oor die moontlikheid van verpligte inentings uitgespreek. Die VF Plus het daarop gewys dat verpligte inentings net tot weerstand sal lei, en dat die regering eerder daarop moet fokus om mense te oorreed en te motiveer as om hulle te forseer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

60 Kommentare

jongste oudste gewildste
E

Dankie

Genis

Dankie, ons mag nie terug gaan werk toe Januarie as ons nie ge-ent is nie….

Robert

Ek steun hulle 100%. Verpligte inent is die nuwe apartheid. Dit bly die persoonlike keuse van elke mens aangesien die vax slegs beskerm teen erge simtome. Jy kan nog covid optel en versprei al is jy dubbel gevax.

Johan

Dit werk in elkgeval nie, hoekom nou nog aan ploeg met die dooie kalf. Laat die wat bang is hul gaan dood spuit en los all die gejaag na die wind, natuurlike immuun sal, soos nog altyd, dit uitsort.

miavos

Over my dead body. En ek BEDOEL dit.