AfriForum wys probleme met ‘brigades’ by skole uit

(Argieffoto: pixabay)

Die burgerregteorganisasie AfriForum het gesê hy is steeds bekommerd oor die Gautengse departement van onderwys se plan om werklose jongmense as lede van Covid-19-brigades by skole in Gauteng te ontplooi. Dít te midde van gr. 7- en gr. 12-leerders landwyd wat veronderstel is om Maandag weer terug op die skoolbanke te wees.

Henk Maree, woordvoerder van AfriForum, het in ’n verklaring gesê die departement het vroeër vandeesweek aangedui dat brigades ’n verskeidenheid pligte by skole sal hê wat insluit die daaglikse skandering van leerders en onderwysers se temperatuur.

Volgens Maree is die spesifieke rol en magte van die brigades egter steeds nie duidelik uiteengesit nie. “Dit sou meer sinvol wees as die departement in verbinding met skole was sodat skole self kan besluit of hulle van die brigades gebruik wil maak. Talle skole het aktiewe ouer- en gemeenskapsbetrokkenheid en dié rol kan vanuit die gemeenskap self gevul word,” meen Maree.

Maroela Media het vroeër berig die departement het vandeesmaand ’n advertensie geplaas waarin poste geadverteer word vir jong werklose jeug tussen 18 en 35 jaar oud om as lede van Covid-19-brigades opgelei te word.

Argieffoto ter illustrasie (Foto: Unsplash)

Maree wys nou daarop dat die advertensie maar tien dae gelede geplaas is. “Dit laat die vraag ontstaan hoe enkele dae lange opleiding lede van brigades voldoende voorberei, asook om nie soos talle goed opgeleide weermag- en polisielede buite hul magte op te tree nie. Dit geld veral in weerlose omgewings soos skoolgemeenskappe.”

Volgens Maree is die data wat lede van die brigade by elke skool moet insamel boonop ook ’n bekommernis wanneer die skool en ouers se privaatheid in ag geneem word. “Tot watter mate jou privaat inligting privaat sal bly, is ’n ernstige vraag wat gevra moet word,” verduidelik hy.

AfriForum het reeds vantevore aangedui dat die “militaristiese ondertoon” wat deur die term “brigade” geskep word, vir hom onrusbarend is aangesien “geen ouer sy kind in ’n militaristiese omgewing wil plaas waar die brigade kortstondig opgelei en, in sommige gevalle, slegs enkele jare ouer as die kind is nie.”

Maree wys verder daarop dat dit boonop nie duidelik is wie die finale sê het indien ’n personeellid en ’n brigadelid van mekaar sou verskil nie.

“Skoolgemeenskappe moet die reg hê om te kies of hulle van hierdie hulp gebruik wil maak of nie. Waar skole nie aan die brigades toegang tot hul terreine, personeel en leerders wil toestaan nie, moet hul keuse gerespekteer word. As dit nie die geval is nie, sal AfriForum beheerliggame met regsadvies bystaan,” het Maree gesê.

Volgens Maree het die meeste skole reeds omvattende planne daargestel om Maandag te begin. Die planne is reeds aan ouers en leerders gestuur. Talle skole het dus geen behoefte aan die brigades nie, meen hy.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Sarel

” Brigades” dui op Militere Term en kan onder gedn omstandighede by skole toegelaat word nie. Jy kan dink wat die Dept. & ANC se plan hiermee gaan wees

Werner

Klink eerder of hulle die kinders na internerings kampe toe stuur waar kom die werkloses vandaan ongeletterde straatlopers wat se mentaliteid kan verwag word ons kan met n George Floyd situasie sit

Johan

Ek weet as ek ‘n onderwyser of ‘n hoof by ‘n skool is, waar ek die brigade lede sou se om die appels te gaan wegsit. En die brigade is blykbaar net in die land van Lefusi ontplooi. Sou dink in die Wes-Kaap instede om nog mense by te voeg in die mengelmoes, gebruik hulle gesonde verstand en laat die personeel doen wat moet gedoen word?

Pappa Beer

Hierdie is n idee wat nog baie stories gaan veroorsaak. Hoe kan jy wild vreemde en skaars opgeleide mense van die straat af vat en hulle in n gesagsposisie sit in n plek waar hulle heeltemal vreemd is. Skole moet deesdae allerhande sekuriteits maatreels tref om die leerlinge en personeel se veiligheid te beskerm, nou word die deure oopgegooi vir enige jan rap en sy maat. Is daar sekuriteits agtergrond ondersoekke gedoen om te verseker dat kinder molesteerders en verkragters nie deel van die “brigade” vorm nie? Ek twyfel sterk.

Johannes

Die sg ‘brigade’ voorspel net moeilikheid. Die onderduimse ANC het met die voorstel net nog ‘n plan om die gemeenskappe te boelie en ‘in line te hou.