‘Afrikaanse onderrig sneuwel voor transformasiegode’

Dr. Theuns Eloff is die oudvisekanselier van die Noordwes-Universiteit, uitvoerende direkteur van die FW de Klerkstigting en voorsitter van onder meer die Trust vir Afrikaanse Onderwys. Foto: www.ethlife.ethz.ch

Suid-Afrika staan tans nie net by ʼn politieke en ekonomiese kruispad nie, maar ook ʼn kruispad vir minderheidsregte.

Dit is die mening van dr. Theuns Eloff, wat die gasspreker by Akademia se 2018-gradeplegtigheid was. Die geleentheid het Vrydag in die Atterbury-teater in die ooste van Pretoria plaasgevind.

Eloff het die studente wat grade, diplomas en hoër sertifikate ontvang het, aangemoedig om hul kennis, insig en vaardighede in diens van hul gemeenskap te gebruik sodat hulle nie net kan oorleef nie, maar ook in welvaart kan oorleef.

Eloff, die oudvisekanselier van die Noordwes-Universiteit, uitvoerende direkteur van die FW de Klerkstigting en voorsitter van onder meer die Trust vir Afrikaanse Onderwys, het gesê met die taalgevegte wat tans by openbare universiteite woed, is en moet daar ʼn plek vir private onafhanklike universiteite soos Akademia wees.

Hy glo alle openbare universiteite sal binne die volgende drie jaar heeltemal verengels. “Die Universiteit Stellenbosch het gesê hy sal nog Afrikaanse klasse vir studente aanbied mits hulle daarop aandring, maar ons is ongelukkig van grootskaalse intimidasie hieroor bewus. Selfs die bestuurder het dit nou erken.

“Die NWU is nou met ʼn proses besig om die universiteit se taalbeleid te hersien en die bestuur van die universiteit is ook gesentraliseer. Wat verder kommerwekkend is, is dat die NWU nou wil hê die dekane moet self besluit watter taalbeleid hulle fakulteit moet volg.” Hy meen dit sal ʼn doodskoot vir Afrikaanse onderrig wees.

Eloff het verder aangevoer die konsultasieproses wat die NWU nou oor die universiteit se taalbeleid wil volg is maar net oëverblindery en daar is reeds besluit die universiteit moet Engels word.

“Die laaste universiteit wat uitstekende gehalte onderrig en ʼn studentelewe gebied het sal dan voor die transformasiegode van die regering sneuwel. Dit is eintlik ʼn oortreding van die artikel 29(a) van die grondwet en bruin en wit studente is die persone wat hierdeur benadeel word.”

Hy het gesê die Universiteit van Pretoria (UP) en die Universiteit van die Vrystaat (Kovsies) het besluit om te verengels omdat die howe bevind het Afrikaans as onderrigmedium is diskriminerend en rassisties. “Die hof se bevindinge het in werklik ook parallelmediumonderrig ongrondwetlik gemaak terwyl die beslissing rondom die UP se taalbeleid bevind het daar moet eerder gelyk teen alle studente gediskrimineer word as om Afrikaanse onderrig te verskaf,” het hy gesê.

Eloff meen dit is waarom dit so belangrik is dat Akademia nou al meer ʼn simbool van gehalte Afrikaanse hoër onderwys word.

“Ons het ʼn tweeledige strategie as dit by Afrikaanse onderrig kom ons sal openbare onderwys so ver moontlik steeds ondersteun met ʼn Afrikaanse onderwysnetwerk wat sal sorg dat ʼn pyplyn van Afrikaanse leerders van kleuterskool tot op tersiêre onderrigvlak geskep word.

“Verder moet ʼn model vir onafhanklike Afrikaanse skole gekry word, selfs al beteken dit ʼn maatskappy moet gestig word om die soort private skole te bou en die skole te vestig landswyd, nie net in die ooste van Pretoria nie. Afrikaans skole, veral in die noorde van Suid-Afrika, is toenemend onder druk.”

Eloff het gesê Akademia het talle eienskappe wat daartoe meewerk om dié hoëronderwysinstelling spesiaal te maak en vir die toekoms goed te posisioneer.

“Die Christelike karakter van die instelling, asook die dissipline, werksetiek en toewyding van die dosente sowel as die studente maak die instelling uniek. Bowendien bied Akademia studente gehalte bekostigbare onderrig in Afrikaans.”

Eloff het verder gesê Akademia se gebruik van tegnologie en sy reikwydte, met sy 13 studiesentrums, maak die instelling ook besonders. Die feit dat daar beplan word om ʼn residensiële kampus in 2020 te open en dat daar reeds hard gewerk word om internasionale erkenning te kry is nog ʼn pluspunt vir Akademia, het Eloff bygevoeg.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

21 Kommentare

jongste oudste gewildste
geregtigheid

Dit is die vloek Moegoeng Moegeng. Viva Akademia & Sol Tech!

Johanna Botha

Wigte en teenwigte werk nie baie goed nie !

Burger

Waar is FW de Klerk en trawante ………wigte en teen wigte om die behoud van minderhede te beskerm? Nou moet dr. Theuns Eloff dit probeer reg praat

PJ

Nou net so slim soos de klerk wat sè die anc het vir hulle gelieg hierdie selfde man was ook baie beindruk met die nuwe S A nou sien hy hy minderheidsregte in gedrang glo hy en de klerk en kie dai wigte en teenwigte in werking stel

ook koos

waar gaan al hierdie wit afrikaanse gegradueerdes van Akademia nou werk kry? Weet hulle nie van regstellende aksie en BEE en radikale ekonomiese transformasie nie? Na ‘n lang gesukkel om ordentlike werk te kry, het ek uiteindelik my universiteitskwalifikasies AFGEHAAL vanaf my CV. Dit, saam met my matrieksertifikaat (nogal uit die ou SA ) en ook leuens op my CV oor my werksondervinding, het my darem weer ordentlike werk gegee, maar eks steeds JARE agter van waar ek kon gewees het as daar geen regstellende aksie was nie.