Afrikaanssprekendes ‘huiwerig’ om inenting te kry

Foto ter illustrasie. (Foto:
Hakan Nural/Unsplash)

Navorsing wat die breër Suid-Afrikaanse bevolking insluit dui daarop dat amper die helfte (42%) van Afrikaanssprekendes huiwerig is om die Covid-19-entstof te ontvang. Dit is veel meer as dié in ander taalgroepe wat teen die inenting gekant is.

Dit is van die bevindings wat in die jongste verslag van die nasionale studie oor inkomste-dinamika en mobiele koronavirus- opname (NIDS-CRAM), bekendgemaak is. Dié bevindings is Woensdag bekendgemaak.

Meeste van die respondente (van alle taalgroepe) wat onwillig is om ingeënt te word, is in die Wes-Kaap (42%) en Noord-Kaap (41%) woonagtig. Afrikaans is veral prominent in dié provinsies. Dit word gevolg deur 29% in Mpumalanga, 28% in die Vrystaat, KwaZulu-Natal, Oos-Kaap en Gauteng asook 26% in Noordwes en 22% in Limpopo.

Die nasionale gemiddeld van Suid-Afrikaners wat nie ingeënt wil word nie, is 29%, dus baie laer as die 42% van Afrikaanssprekendes.

Sowat 35% Sesotho- en 32% Engelssprekendes is daarteen gekant om ingeënt te word, terwyl 28% van Tsongasprekendes en 30% van Setswana- en Siswati-sprekendes gekant is teen die entstof. Respondente wie se huistaal Tshivenda, Ndebele, Xhosa, Zoeloe en Sepedi is, het ʼn laer huiweringskoers van onderskeidelik 18%, 19% en 25%.

“Onder die 29% wat nie ingeënt wil word nie, is 16% hewig gekant daarteen en 8% matig gekant daarteen. Minder as 6% het aangedui dat hulle onseker is of hulle die entstof sou aanvaar, indien dit aan hulle beskikbaar gestel word,” lui die NIDS-CRAM verslag.

Dís hoekom mense nie ingeënt wil word nie

Meeste van dié wat nie ingeënt wil word nie (31%) is bekommerd oor die newe-effekte van die entstof, terwyl 21% twyfel oor die effektiwiteit daarvan en 18% glad nie die entstof vertrou nie.

“Slegs 8% van die respondente wat nie die entstof wil ontvang nie, sê dit is omdat hulle ʼn lae risiko is om Covid-19 op te doen.”

Uit die verslag blyk dit dat diegene met slegs laerskoolopleiding, jeugdiges en diegene wat sosialemedia as ʼn betroubare bron van inligting ag, meer geneig is om nie ingeënt te wil word nie.

“Diegene wat ouer is as 60 of chroniese siektes soos diabetes het, is egter minder geneig om huiwerig oor die entstof te wees. Ras is ook nie ʼn beduidende faktor wanneer dit kom by die huiweringskoers nie.”

Die hoeveelheid respondente in Suid-Afrika wat bereid is om die entstof te ontvang, is hoër as die beramings wat onlangs in die VSA en Frankryk gedoen is. Dit wil egter voorkom of minder mense in Suid-Afrika bereid is om die entstof te kry as in lande soos China, Brasilië en Brittanje.

Bron: NIDS-CRAM

Deel van: SA-nuus

Koronanuusbrief

Wil jy op hoogte bly van alle nuus oor Covid-19 op Maroela Media? Teken in op die nuusbrief.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

60 Kommentare

jongste oudste gewildste
Alta Alleman

Niks daarmee verkeerd om dit te weier nie.

Elize

ag nee dis nonsens

Marianna

Dankie tog vir al die open minded mense. Julle is nie skape nie. Julle dink vir julle self.

Warren

Dit gee die staat die reg om n “inentings pasboekie” uit te lewer.

Wilhelm

Wel, of jy dit wil neem of nie wil neem nie is jou keuse, maar in Suid Afrika gaan jy lank wag voor jy die uiteindelik die keuse moet maak! Miskien so teen die jaar 2041, dalk.