Al meer toestelle gee die gees weens beurtkrag

(Argieffoto: Claudio Schwarzel/Unsplash)

Vandat beurtkrag Suid-Afrika weer in donkerte gedompel het, is kragverbruikers raadop oor elektriese toestelle in en om die huis wat weens beurtkrag die gees gee. Jane van der Linde, ’n inwoner van Lynnwood, Pretoria, sê haar yskas én motorhek het albei die afgelope paar maande gebreek weens die kragtoevoer wat tydens beurtkrag aan- en afgeskakel word.

“Die elektrisiën wat my yskas herstel het, sê hulle kan nie voorbly met klante wie se toestelle breek nie,” vertel Van der Linde.

Gert Viljoen, ’n elektrisiën van Lydenburg in Mpumalanga, sê dit maak heeltemal sin dat toestelle die een na die ander weens beurtkrag oppak. “As die krag ná beurtkrag weer aangaan, kom die krag skielik met ʼn té sterk elektriese stroom deur omrede ʼn hele gebied of dorp se krag weer aangesit word. Die elektriese stroom neem dan ’n rukkie om weer te stabiliseer,” verduidelik Viljoen.

Calla van der Merwe, ’n elektrisiën van Schweizer-Reneke, stel voor huishoudings moet probeer om hul krag by die hoofskakelaar af te skakel wanneer beurtkrag inskop. Dit is om te verhoed dat die elektriese stroom te sterk deurkom en elektriese toerustings beskadig word wanneer die krag weer aangaan.

“Skaf vir jou ’n paneelliggie aan en koppel hom bo-aan jou hoofskakelaar op die kragboks. Aan die bokant van die hoofskakelaar bly die krag altyd aan en as die hoofskakelaar af is, sal die liggie steeds brand. Só kan jy sien wanneer die krag aankom en die hoofskakelaar weer aanskakel.”

Van der Merwe waarsku mense om nie aan elektriese toerusting of kragproppe te werk wanneer die krag af is nie. “As jy aan iets moet werk, sit die krag by die hoofskakelaar af, want as die krag weer aangaan, kan jy geskok word.”

Hy stel ook voor mense moet probeer om die kragproppe van waardevolle elektriese toerusting af te skakel tydens beurtkrag.

(Arieffoto: Christel Cornelissen)

Van der Merwe deel ook ander wenke en voorsorgmaatreëls vir wanneer beurtkrag inskop:

  • Maak doodseker jou hek, alarm of motorhuis het batterye vir wanneer die krag ontydig afgaan. Jy wil nie met jou hande in jou hare sit wanneer jy by die hek wil in- of uitgaan nie.
  • Maak seker jou selfoon is gelaai vir wanneer die krag afgaan of laai jou selfoon in jou kar of met ’n laaier wat nie met elektrisiteit werk nie.
  • Maak seker jy het genoeg kerse en vuurhoutjies in jou huis. Wees versigtig wanneer jy wel met kerse werk om ʼn brand te verhoed.
  • Vries 2 ℓ-koeldrankbottels vol water vooraf en sit die bottels in jou yskas om jou yskas koud te hou tydens beurtkrag.
  • Moenie jou yskas gereeld oopmaak nie.
  • Skakel waardevolle elektriese toerusting soos televisies of rekenaars saans by die muurprop af of wanneer jy die huis verlaat. Jy weet nooit wanneer die krag dalk kan afgaan nie.
  • Laai ’n betroubare beurtkragskedule op jou selfoon of rekenaar af om te kan kyk wanneer beurtkrag inskop. Druk selfs ’n kopie uit om seker te maak jy bly op hoogte van die skedule.

(Argieffoto: pixabay)

Viljoen en Van der Merwe stel voor dat huis- en besigheidseienaars poog om heeltemal onafhanklik van Eskom te funksioneer deur gebruik te maak van alternatiewe energiebronne soos gas en son. “Om in ’n kragopwekker te belê is ook altyd ’n goeie opsie. Op lang termyn moet Suid-Afrikaners begin dink aan sonpanele, songeisers, gasgeisers en gasstowe,” sê Van der Merwe.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

46 Kommentare

jongste oudste gewildste
Karlahari

En die hartseer is dat jy in meeste gevalle nie kan eis van jou huis- of huis inhoud versekering.
Volg dit op met jou huidige versekeraar.

PJC

Dit lyk nie of daar gou ń oplossing vir die probleme by Eskom gaan wees nie. Dit lyk asof dinge dalk net nog slegter kan gaan. Iewers is ń helse skroef los en niemand is bereid om met die waarheid vorendag te kom nie.

John

Gas gaan mettertyd duur en skaars word. Waarom voer ons nie grootskaals gas in nie ook vir verhitting van huise gedurende die koue maande. Sasol kan gerus in die bedryf belè. Boor op die Suidpool.

Zettie

Makliker gesê as gedaan ja. Ek is bie by die huis wanneer my krag weer aankom nie so ek sal nie die hoofskakelaar kan aansit nie, weens werksverpligtinge. My prepaid kragboks skop af sodra die krag aangekom het wat beteken dat my yskas en geyser die heeldag afgeskakel is totdat ek by die huisgekom het net on te vind dat die krag somtyds net ‘n halfuur later weer gaan afgaan volgens die skedule. Ons land is een groot grap!

Lindie

Ek raai dat dit ook ‘n rede is waarom huise meer as ooit afbrand. Asook die krag stasies wat opblaas, ons krag is nie gemaak om kort kort aan en af te skakel nie!