Alexander Forbes-man bedank oor #GuptaLeaks

Alexander Forbes, Johannesburg (Foto: Google Maps)

Alexander Forbes Group Holdings het Maandag aangekondig dat sy beleërde nie-uitvoerende direkteur, Moses Kgosana, met onmiddellike effek uit die raad bedank het.

Kgosana, ʼn voormalige uitvoerende hoof van die ouditeursfirma KPMG, sou op 31 Augustus as voorsitter begin by die finansiële en risikodiensteverskaffer, maar het nou van dié rol onttrek.

Dit het verlede week tydens die #GuptaLeaks-e-posse aan die lig gekom dat Kgosana nou bande gehad het met Atul Gupta terwyl KPMG ouditeure en raadgewers was vir die Oakbay Group wat deur die Gupta-familie besit word.

Volgens die ondersoekende joernaliste van AmaBhungane, het die Guptas na bewering ongeveer R30 miljoen, wat geoormerk was vir die Vrystaatse Suiwelprojek, deur hul maatskappy, Linkway Trading (Edms) Bpk verduister en KPMG het toegelaat dat die geld vir hul luukse troue in 2013 as ʼn “sake-uitgawe” afgeskryf kan word.

“Sedert hy bewus geraak het van onlangse beweringe wat gepubliseer is oor KPMG wat verband hou met sy vorige posisie as uitvoerende hoof en senior vennoot van KPMG, het hy geglo dit is die regte ding om te doen vir homself, die maatskappy, sy kliënte en aandeelhouers,” het Alexander Forbes in ʼn verklaring oor Kgosana gesê. “Alexander Forbes verwelkom sy besluit.”

Die huidige voorsitter, Sello Moloko, sal intussen aanbly as nie-uitvoerende voorsitter en het Kgosana bedank vir sy bydrae as direkteur die afgelope twee jaar.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

21 Kommentare

jongste oudste gewildste
Pieter Ellis

Nou ja Moses, die vraag is of jy nogsteeds sou kop uittrek indien jou skandes nie ontbloot was nie. Ek dink nie so nie. Nou skielik doen hy dit in belang van die maatskappy en kliente. Tyd om n leefstyl oudit op hom te doen.

Vryheid

Lekker steel ons manne nou, elke korrupte amptenaar, minister en CEO maak seker hulle kry hul pond vleis voor als in duie stort.

Stiena

Geen wonder dat sommige groot finansiele instellings jare lank al nie besigheid met KPMG wil/wou doen nie.

Uitskietstoel

Ek het my nog altyd verwonder aan die uitskietstoel by vegvliegtuie. Sodra jou vliegtuig poertes moertes is dan druk jy net ‘n knoppie en siedaar daar raak jy ontslae van die probleem. Nou weet ek dat daar ander goete is wat óók toegerus is daarmee.

Paul

Net gedurende die naweek het KPMG nog alles driftig ontken en gesê hulle verwelkom ‘n ondersoek. Wat nou KPMG?