‘Alle weë word oorweeg om NGV te beveg’

Argieffoto (Foto: DarkoStojanovic, Pixabay)

Solidariteit het vandag bekendgemaak dat hulle alle stappe oorweeg om die skadelike gevolge wat die inwerkingstelling van die voorgestelde Nasionale Gesondheidsversekering (NGV) sal hê, te beveg.

Morné Malan, senior navorser verbonde aan die Solidariteit Navorsingsinstituut (SNI), het gesê die NGV in sy huidige formaat stuur af op ʼn onbetwisbare ramp. “Alle mediese praktisyns, belastingbetalers en Suid-Afrikaanse burgers sal geweldig negatief daardeur beïnvloed word. Derhalwe, onderneem ons om alle hulpbronne tot ons beskikking te gebruik om die impak daarvan te bekamp.”

Solidariteit sal insette lewer by enige openbaredeelname-proses om die wetsontwerp se tekortkominge bloot te lê, maar tref ook voorbereiding indien die wetsontwerp in sy huidige, verdoemende formaat aanvaar sal word.

“Ons ondersoek tans alle formele prosesse waardeur ons die voorgestelde wet kan beveg en het ook reeds ons regspan instruksie gegee om die grondwetlikheid van die huidige formaat in die hof te toets, sou dit nie na wense gewysig word nie. Die geskiedenis van die NGV word gekenmerk deur ʼn onbereidwilligheid van die departement om enigsins af te wyk van hul aanvanklike plan en daarom berei ons voor om daardie voorstel aan te pak, indien nodig, in die konstitusionele hof. Ons bestudeer en is nou al vir twee jaar betrokke by die NGV. Ons is goed ingegrawe en staan reg om, indien nodig, te baklei.”

Benewens deelname aan die formele regsprosesse wat gepaardgaan met die proses van die NGV bekragtiging, ondersoek Solidariteit ook alternatiewe stelsels wat kan funksioneer sou die NGV in sy huidige formaat die krag van wet bekom.

Hennie Bierman, hoof van Solidariteit se Beroepgilde vir Gesondheidspraktisyns, het bygevoeg terwyl die organisasie deelneem aan al die formele prosesse in ʼn poging om die drastiese gevolge van die wetsontwerp se inwerkingtreding te beveg, ondersoek hy ook internasionale alternatiewe om seker te maak dat selfs onder ʼn NGV-bestel sy lede steeds hul beroep kan beoefen met die vryheid, onafhanklikheid en passie waarop hulle geregtig is.

Volgens Malan het Solidariteit gevolglik ʼn allesomvattende prosedure in plek met verskeie gebeurlikheidsplanne. “Ons sal die wetsontwerp probeer beïnvloed en indien dit nie slaag nie, die inwerkingtreding probeer beveg. Indien dít nie slaag nie, sal ons sisteme in plek sit wat Suid-Afrikaanse burgers teen staatsinmenging in gesondheid sal inent. Ons sal veg vir Suid-Afrikaanse burgers se gesondheid, of die staat daarvan hou of nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

47 Kommentare

jongste oudste gewildste
Charles

Uitstekend, dankie.

Indien nie vir julle ouens nie was ons lankal verlore en in die vergetelheid gewees onder die juk van ‘n volstrek KOMMUNISTIESE ANC bewind.

Doe zo voort!

Sirkus

Mooi so Solidariteit !!! Kan ons bo en behalwe ons lidmaatskap by Solidariteit bydra tot hierdie geveg. MM kan ons laat weet …

De Villiers

Dankie Solidariteit dat julle hierdie saak tot voordeel van almal behartig. Ten minste het julle integriteit en insig, iets wat ver te kort geskiet het met die opstel van die NGV.

Ander Koos

Kans dat Konstitusionele Hof teen regering uitspraak gee is baie skraal Sterkte Solidariteit hierdie gaan groot stryd wees.

Andrea

Dankie vir Solidariteit en Afriforum. Waar sou ons sonder julle gewees het? Dankie vir mense wat soveel murg in hul pype het.