‘Amcu moet verantwoordelik begin optree’

Amcu-president Joseph Mathunjwa (Foto: Simphiwe Mbokazi/African News Agency/ANA)

Die vakbond Solidariteit het gesê Amcu se absurde beskuldiging dat Solidariteit apartheid-bevoorregtes en kolonialiste beskerm deur nie saam met hulle by Sibanye-Stillwater te staak nie, spreek van onkunde en ideologiese gestremdheid

Gideon du Plessis, hoofsekretaris van Solidariteit, het bygevoeg Solidariteit het saam met die National Union of Mineworkers (Num) en Uasa ʼn loonooreenkoms met Sibanye-Stillwater onderteken met die doel om mynwerkers, insluitend Amcu-lede, se werksekerheid te verhoog in ʼn tyd waar die mynbedryf onder geweldige druk verkeer.

Minstens 15 000 lede van die Association of Mineworkers and Construction Union (Amcu) staak al drie maande lank, sedert 22 November 2018, by Sibanye se goudmynbedrywighede en eis hoër lone. Die vakbond het Dinsdag gesê hy beplan ʼn sekondêre staking volgende week in die platinum- en steenkoolbedryf om sy lede in die goudbedryf by Sibanye-Stillwater te ondersteun.

“Amcu se staking by Sibanye, wat reeds drie maande duur, is ʼn reuse- bydraende faktor tot die feit dat nagenoeg 7 000 Sibanye Stillwater-werknemers nou aflegging in die gesig staar,” het Du Plessis verduidelik. “Die verlies aan inkomste van die 11 000 stakende Amcu-werknemers kom op ʼn gemiddelde verlies van R42 246 per stakende werker neer, wat beteken werkers is besig om hulself armer te staak.”

Du Plessis sê voorts dat Amcu vinnig op pad is om soos destyds met hul vyf maande lange platinumstaking, weer duisende werksgeleenthede te vernietig. “Amcu se 2014-staking het tot 16 000 werksverliese by Lonmin alleen gelei en is die hoofrede waarom dié maatskappy nou op sy knieë is en werkers steeds swaar aan die skuldlas dra.”

Na afloop van die 2014-staking het Lonmin met ʼn afleggingsproses begin waartydens hy sy werksmag aanvanklik met 8 000 werknemers besnoei het. Die mobilisering van die K4-skag is ook gestaak wat daartoe gelei het dat ʼn verdere 6 000 werksgeleenthede vernietig is. Na afloop van die afleggings het Lonmin deur natuurlike omset hul werksmag met ʼn verdere 2 000 werknemers verminder. “In totaal is dit 16 000 werksverliese by een maatskappy, met ʼn verdere 12 000 Lonmin-werknemers wat potensieel nog hul werk oor die volgende twee jaar kan verloor en dit alles as gevolg van die Amcu-staking,” het Du Plessis gesê.

Amcu het reeds hul lede by ander mynhuise opgeroep om saam met hul lede by Sibanye-Stillwater te begin staak. “Hierdie oproep is onverantwoordelik en nie in enige een se belang nie. Dit gaan bloot net tot verdere werksverliese lei,” het Du Plessis gesê.

Dit is ook kommerwekkend dat Amcu se staking by Sibanye geken word aan hoë vlakke van geweld waar sewe nie-stakende werkers reeds vermoor is en 149 ernstig beseer is, terwyl tientalle huise van nie-stakende werkers afgebrand is. “Hierdie gruwelike miskenning van werkers se reg om te werk moet tot ʼn einde kom en daarom moet die oorspoel-effek na die res van die mynbedryf ten alle koste verhoed word,” het Du Plessis gesê.

Amcu se topleierskap se ideologiese retoriek en populistiese uitsprake is uitgedien en Solidariteit doen daarom ʼn beroep op Amcu se leiers om hul lede, en mynwerkers in die algemeen, se werksekerheid eerste te stel.

Verder doen Solidariteit ook ʼn beroep op Amcu-lede om hul gesinne en afhanklikes se belange in ag te neem, nie hulle werk op die spel te plaas nie, en hulle ook nie te laat misbruik deur individue in hul eie geledere met persoonlike agendas nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
Hennie

Unies is die grootste kanker naas die cANCer wat die ekonomie vernietig. En al wie seerkry is die meerderheid “voorheen benadeeldes”. Ek dink nie die “VB’s” het ‘n idee wat se gemors is aan die kom vir hulle nie. Hulle gaan nog verlang na die ou dae…

George van Bloem

Ongelukkig dink ek nie mens kan eers naastenby AMCU en verantwoordelikheid in dieselfde asem noem nie. Die unies en hulle kommunisiese/sosialistiese denke is een die grootste spykers in Suid Afrika se ekonomie doodskis.

Boerboel

Stem saam Hennie, die Unie Bestuur kry nog elke maand sy salaris wat die lede bydra, As ons kyk na die Lonmin wat nog steeds sukkel , gaan daar nog baie werk verloor word as Amcu by ander myne gaan staak. Kyk net hoe laag is die pryse van Goud en plat. Die families van die werkers gaan baie swaar kry. Kyk hoe het dit in Rustenburg gegaan met Amcu se staking . Almal ly onder dit. Besighede het oornag gesluit !

Johanna

Die stakers se regte moet respekteer word, maar hulle mag ander wat wil werk se reg om te lewe neem. Hulle kan dood maak, beseer en ander se eindom beskadig. En dan as dit te erg raak en die polisie weer moet ingryp, dan is di polisie verkeerd en kry hulle miljoene. Wat van 7 werkers wat dood gemaak is. Wie gaan vir hulle kinders sorg. Ons land werk verkeerd om. As jy die wet gehoorsaam kan die wetteloses aan jou doen wat hulle wil en hulle regte word beskerm. AMCU gaan weer hier na net sy hande in onskuld… Lees meer »

Ruan

Daar is ‘n maklike uitweg. Hul wil 6 000 mense laat gaan en daar is 11 000 Amcu lede. Trek daai 6 000 uit die 11 000 Amcu lede uit. Hule wil mos klaar nie werk nie so haal die probleem kinders een vir een uit.