Amptenare skep geld wat arm kinders moet help

geld 4 kontant rand

Foto ter illustrasie. (Argieffoto)

Honderde miljoene rande in welsynstoelae word maandeliks aan meer as 170 000 staatsamptenare oorbetaal. Meeste van dié geld kom armes toe, wat nie behoorlik vir hul kinders of hulself kan sorg nie.

Die toelae wat aan amptenare uitgedeel word, sal egter binnekort opgeskort word.

Die minister van maatskaplike ontwikkeling, Lindiwe Zulu, het in antwoord op ʼn parlementêre vraag van die DA gesê die Suid-Afrikaanse Agentskap vir Maatskaplike Sekerheid (Sassa) het in Julie vanjaar R200 miljoen aan altesaam 177 108 staatsdienswerkers betaal, berig Times Live.

Meeste van dié begunstigdes (143 081) het kindertoelae ontvang wat in een maand die staat R122 miljoen uit die sak gejaag het.

Altesaam 11 589 amptenare het toelae vir pleegsorg, ter waarde van R20,7 miljoen ontvang, terwyl meer as 12 000 amptename onderskeidelik ouderdom-, ongeskiktheid- en versorgingtoelae vanaf die staat ontvang het.

Volgens Zulu word planne gemaak om alle welsynstoelae wat aan staatsamptenare betaal word, op te skort. Sy het ook aangedui dat staatsamptenare voortaan sal moet bewys dat hulle geregtig is op ʼn toelaag.

“Diegene wat aansoek doen om ʼn toelaag te ontvang, se aansoek en inkomste sal hersien word om te bepaal of hulle wel hiervoor kwalifiseer.”

Amptenare sal wel geregtig wees om ʼn toelaag te ontvang indien hulle as pleegouers vir ʼn kind optree, het Zulu gesê.

“Waar die pleegsorg toelae saam met versorgingtoelae vir dieselfde kind betaal word, word die begunstigdes se aansoeke nie hersien nie en sal staatsamptenare geen wette oortree indien hulle kwalifiseer om dié soort toelae te ontvang nie.”

Die minister het bygevoeg dat alle gelde wat onregmatig aan staatsamptenare betaal is, weer ingevorder sal word.

“Indien dit aan die lig kom dat staatsamptenare ʼn toelaag ontvang waarop hulle nie geregtig is nie, sal dit by hul departement aangemeld word sodat dissiplinêre stappe teen die betrokke amptenaar geneem word.”

Jacques Broodryk, AfriForum se veldtogtebestuurder, het egter gesê bewyse dat dié gelde wel terugbetaal is en dat stappe teen die skuldiges geneem word, eindelik aan die publiek geopenbaar moet word.

“Die geld moes lankal reeds ingevorder geword het. Die ANC-regering wys net weereens hoe onbevoeg hulle is om belastingbetalers se geld te bestuur.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

27 Kommentare

jongste oudste gewildste
Pierre

Gemors

Chris dupreez

Hoe is dit moontlik dat enige sassa toelae aan staatsamptenare betaal word. Jy kwalifiseer nie vir enige toelae as jy n werk het of n pensioen kry nie. Nog n bedrog spul deur die anc regering

casper

Kan nie wees nie — die staat is dan so effektief met alles !!!

Mier14

Hulle moet d geld terugbetaal en tronk toe gaan vir bedrog. Genoeg is genoeg. Nadat ons belasting betaal het, is ons nogsteeds die wat die armes moet help. Geen blerrie gewete, maar d wiel sal draai vir die skuldiges. Op d ou einde score jy dalk op aarde, maar God slaap nie.

Persheks Adri

Net dissiplinêre stappe? Nee dis onaanvaarbaar en die klomp sit mos met hoeveel kinders net om te eis? Snert man!