Amy-Leigh-verdagtes: Hiér is die vermeende baasbreine

Die beskuldigdes haas terug na die aanhoudingselle. Foto: Mia Slabbert

Die drie beweerde baasbreine agter die ontvoering van klein Amy-Leigh de Jager presies ʼn week gelede, het Maandag vlugtig in die Vanderbijlpark-landdroshof verskyn.

Die sesjarige Amy-Leigh is Maandag omstreeks 08:00 voor die Laerskool Kollegepark, waar sy ʼn graad R-leerder is, uit haar ma, Angeline de Jager, se arms gegryp. Vier mans in ʼn Toyota Fortuner het glo met haar weggejaag.

Vandag het Tharina Human (27), ʼn onderwyseres by die skool, asook Laetitia Nel (40) en Pieter van Zyl vlugtig op aanklagte van ontvoering in ʼn volgepakte hof verskyn.

Human se blonde hare was styf in ʼn poniestert vasgemaak waar sy langs Nel en Van Zyl in die beskuldigdebank verskyn het. Dit het gelyk of Van Zyl beserings aan sy gesig opgedoen het.

Human het deurentyd haar gesig probeer verbloem. Foto: Mia Slabbert

Die hofverrigtinge het maar enkele minute geduur waarna landdros Hussein Khota die saak tot 19 September uitgestel het wanneer die drie ʼn formele aansoek om borgtog gaan indien. Hulle het nog nie op die aanklagte gepleit nie.

Die verdagtes het hierna baie vinnig na die aanhoudingselle beweeg. Human het haar gesig met ʼn baadjie probeer wegsteek.

De Jager en haar man, Wynand, het voor in die hof gesit, digby waar Riaan Botha, Human se pa, ook gesit het. Hulle het die hofsaal inderhaas verlaat nadat die hof verdaag het.

Wynand en Angeline de Jager in die hof. Foto: Mia Slabbert

Die Gautengse LUR vir onderwys, Panyaza Lesufi, het ook die hofverrigtinge bygewoon. Hy het buite die hof gesê hy wou sy ondersteuning aan die gesin gee en hulle bedank omdat hulle nie besluit het om hulle kinders na ʼn ander skool te stuur nie.

Human is reeds geskors. “Ons is ook hier om antwoorde te kry. Ons wil weet hoekom. Hoekom is ʼn skoolkind geteiken? Hoekom doen iemand iets van dié aard,” het Lesufi gesê.

Lesufi praat met Amy-Leigh se ouers in die hof. Foto: Mia Slabbert

Die LUR het gesê verskeie leerders het vir berading ná die voorval gevra, terwyl onderwysers ook gevra het vir ondersteuning. “Ons het ouers wat vra of hulle kinders veilig is,” het Lesufi gesê.

Human se pa het sy dogter in die hof ʼn drukkie gegee en ná die hofverrigtinge gesê die familie het ʼn hegte band en dat hulle saamstaan deur die gebeure.

“My dogter is lewend. Die ontvoerde dogtertjie is lewend en dit gaan goed met haar by die huis. Ons moet nou hoop en glo en na die toekoms kyk,” het Botha, wat by tye baie emosioneel geraak het, buite die hof gesê. Verskeie mense het hom ook daar ondersteun.

Die ontvoering van Amy-Leigh het gelei tot ʼn reusesoektog na haar – asook onophoudelike bespiegelings oor wie vir die dramatiese ontvoering verantwoordelik was. Amy-Leigh is die volgende oggend ongedeerd teruggevind.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

79 Kommentare

jongste oudste gewildste
Dragonfly

Ek verstaan nie. Hulle het gepraat van 4 vrouens en 1 man. Waar is die 4rde vrou dan?

Adri

Ek verstaan nie wat Lesufi daar maak nie. Die ontvoering het nou wel buite ‘n skool gebeur, maar dit kon enige ander plek ook gebeur het. Hy is sommer net nuuskierig en probeer een of ander wins uit die episode maak.

Leslie

Ai grootmense …. ek sak in aarde in van skaamte vir hul part.

CR

Waar is die vier mans wat haar gegryp het voor die skool?

Daleen

Ai mnr Human. Mens se kinders kan mens so teleurstel…maar bly jou kind.