‘ANC gebruik pandemie om ras-ideologie te bevorder’ – Afrikanerbond

Pres. Cyril Ramaphosa spreek die land toe. (Foto: Jairus Mmutle/GCIS)

Die Afrikanerbond het ʼn brief aan pres. Cyril Ramaphosa gestuur waarin dié organisasie daarop wys dat die ANC die Covid-19-pandemie misbruik om sy eie ideologie te bevorder.

“Ons het nou by verskeie geleenthede verneem dat die regering swart ekonomiese bemagtiging (SEB) op verskeie maniere bevorder deur die volgehoue transformasie in die samelewing en radikale ekonomiese transformasie- ideologie van die regering. Ons weet ook nou dat swart ekonomiese bemagtiging as rasgedrewe transformasiedoelwit van die ANC en regering hierdie jaar gaan verskerp,” lui die brief.

Die organisasie verwys na Ramaphosa se versoek dat die verspreiding van Covid-19-entstowwe slegs geleenthede vir swart sakelui sal bied, die stigting van die Toerisme-ekwiteitsfonds (TEF) wat swart entrepreneurs moet ondersteun en dat aansoekers vir radio-uitsaailisensies ook aan SEB-vereistes moet voldoen.

‘n Weermaglid op patrollie tydens die landwye staat van algehele afsondering. (Foto: Henk Kruger/ANA)

“Ons weet nou ook dat transformasie, oftewel rasgedrewe demografiese verteenwoordiging, nie meer net ydele politieke retoriek is nie, lui die brief. “Om Covid-19 te gebruik vir radikale ekonomiese transformasie (RET) is polities naïef en uiters gevaarlik. Die ideologiese doelwitte van RET sal die land voortstu op ʼn reeds katastrofiese en onomkeerbare weg van rampspoed. Die regering sal enige binnelandse en buitelandse belegging op groot skaal vervreem indien die regering voortgaan om ons ekonomie met ideologiese onbeholpenheid en rasteikens te verstrengel.”

Die Afrikanerbond waarsku ook teen die Wet op Rampbestuur en die gepaargaande nasionale bevelsraad en afsonderingsregulasies. “ʼn Meer permanente ‘nasionale bevelsraad’ is nou al vir tien maande gevestig om Covid-19 te hanteer en te bestuur, maar met die gevolg dat gesag amper roekeloos ingespan word vir ʼn klomp regulasies en optredes wat moontlik andersins nie toegelaat sou word nie. Hiermee word oorsig deur die parlement vermy.

“Alle aanduidings is tans daar dat die ANC-regering die voordeel ingesien het van heers en oorheers deur die Wet op Rampbestuur in ʼn ramptydperk en nie die beginsels van goeie regering volg wat deur die Grondwet daargestel word nie. Dit het die ruimte gebied vir die vinniger implementering van die ANC se weergawe van sosialisme en gesentraliseerde maatskaplike manipulering volgens die ANC se uitgediende ideologie van die nasionale demokratiese revolusie.”

Restaurante gesluit weens afsonderingsregulasies. (Foto: EatStanbul/Facebook)

Die Afrikanerbond is verder van mening dat die ANC nie meer die skeiding tussen staat en party wil of kan eerbiedig nie.

“Dit word duidelik dat afgesien van u normale regeringsaktiwiteite ANC-geleenthede ook blatant ingespan word om Covid-19 besluite en diepgaande regeringskwessies met Suid-Afrikaners te deel deur ANC-geleenthede soos die 8 Januarie- toespraak, die Progressive Business Forum-toespraak en die ANC-lekgotla-toespraak. Hiermee vervaag die noodsaaklike beginsel van skeiding tussen staat en party.

“Suid-Afrika het ʼn verwoestende 2020 gehad met Covid-19, en alle aanduidings is dat dit [2021] nie ʼn beter jaar sal wees nie,” voer die Afrikanerbond aan. “Ons land het nou dringend ekonomiese herstel nodig ná meer as ʼn dekade van wanbestuur, ineenstoring van dienslewering en infrastruktuur, beurtkrag, vernietiging van staatsondersteunde entiteite, xenofobiese geweld, grootskaalse korrupsie en staatskaping. Hierdie werklikhede het nog steeds ʼn enorme negatiewe impak op ons ekonomie, op ons land en sy mense. Dit is net deur Covid-19 vererger.”

Die organisasie sê hy is nie blind vir die uitdagings wat die land het nie, maar probeer juis om met sy direkte gesprekke met die president sinvolle oplossings hiervoor te vind: “Die Afrikanerbond bied hiermee weer ons hulp en denke aan u om Suid-Afrika in sy potensiaal te laat groei en te blom.”

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

31 Kommentare

jongste oudste gewildste
Gysbert

Die Broederbond/Afrikanerbond (selfde ding) het dan so lustig daaraan meegedoen om die ANC in die posisie te plaas waar hulle in staat is om hul ideologie te bevorder. Het hulle REGTIG gedink alles gaan net pragtig en regverdig wees wanneer kommuniste oorneem? Het hulle gedink kommunisme is dood na die val van die USSR en Berlynse muur? Was hulle werklik só naïef? Maar noudat die broeders se kinders oorsee sit en hulle hul pensioen en medies kan verloor, nou is hulle ewe skielik ongelukkig. Julle het in 1992 die tandepasta uit die buisie gedruk. Om dit nou te probeer terug… Lees meer »

Jaco

Wat nou die Afrikanerbond is, was in die ou SA die geheime Broederbond. Die Broederbond was weer die “think tank” agter die regerende Nasionale Party. Stelselmatig het die Broederbond en die NP al hoe meer “hervorm”, al hoe meer toegegee en uiteindelik aan die ANC oorgegee. As mens die NP en die Broederbond gewaarsku het dat die hervorming nie gaan werk nie en hulle gewys het op hoe die res van Afrika lyk, het hulle jou uitgekryt as verkramp en rassisties. So dis UITERS vreemd dat die Afrikanerbond nou kla oor SA so verval. Dis dan hulle “hervormings” wat die… Lees meer »

PH

Is dit nie wat die Nazi’s gtedoen het nie? Vra maar net.

Pieter

Die sal ek bly se. Anc en eff saam is die groot rasiste in S.A. As jy vir hulle stem is jy net so skuldig aan rasisme. – My opinie.

Danie

ANC RASSISTE !