‘ANC is in die moeilikheid’ sê Ramaphosa

Pres. Cyril Ramaphosa (Foto: Twitter / @MYANC)

Die uitslag van verlede jaar se verkiesing is net een van die aanwysers dat die ANC in die moeilikheid is.

“Die swak toestand van ons ANC-beheerde munisipaliteite en die wydverspreide voorkoms van korrupsie in ons geledere is net ’n paar van die diep ontstellende aanwysings,” het pres. Cyril Ramaphosa Sondag gewaarsku tydens die slotrede van die ANC se Mpumalanga-verkiesingskonferensie in eMalahleni (Witbank).

Hy het verwys na die ANC se Mbombela-kantoor wat verlede maand deur ’n “gegriefde ANC-lid” aan die brand gesteek is en dit beskryf as ’n metafoor vir die stand van sake in die ANC. “Die huis is aan die brand. Nie net die dak of die mure nie, die hele huis.”

Ramaphosa het ook verwys na al meer ANC-lede wat die party voor die howe daag, geweld by takvergaderings en ANC-raadslede wat aangeval of selfs vermoor word weens wedywering tussen politieke partye sowel as binne die party self.

“Ek vra julle kamerade, watter boodskap stuur ons aan die Suid-Afrikaanse mense wat ons belas het om hulle te lei? Dit stuur die boodskap dat ons te besig is om ons eie interne brande te blus om aandag te gee aan die dringende program om hierdie land reg te ruk en die lewe van sy mense te verbeter. Ons sien ontevredenheid in diensleweringsbetogings, waarvan baie gewelddadig word.”

Volgens Ramaphosa kon dit ook gesien word in die kiesersopkoms in verlede jaar se verkiesing, wat die laagste was van enige verkiesing in die post-demokratiese Suid-Afrika.

“Nog nooit tevore het die ANC die dringende program van vernuwing wat ons aangepak het, nodiger gehad nie. Nog nooit was dit dringender dat ons die vertroue van Suid-Afrikaners herwin nie, want kamerade, ek herhaal, die huis is aan die brand.

“En as die plaaslikeregeringsverkiesing ’n barometer is van dinge wat voorlê, sal die nasionale verkiesing in 2024 soortgelyke, indien nie slegter resultate vir ons as die ANC oplewer nie.”

Dit is die ANC wat die verantwoordelikheid het om mense se lewens te verbeter, het Ramaphosa gesê.

“Dit is nie ’n verantwoordelikheid wat ons kan uitkontrakteer, of op die agtergrond kan plaas terwyl ons ons interne probleme oplos nie. Gegewe die omvang van die taak, en die hoeveelheid werk wat gedoen moet word, het ons drie dinge nodig.

“Die eerste is ’n vlymskerp fokus op die taak op hande, vry van alle afleidings wat ons oë van die bal neem. Ons weet almal wat hierdie afleidings is. Dit is binnegevegte en interne twis, faksies en teenstrydighede wat gewortel is in gevegte oor toegang tot mag en hulpbronne. Die tweede is om heropbou en herstel aan te dryf om werk te skep en groei te bevorder, en daarvoor het ons niks minder nodig nie as ’n bekwame, sterk en verenigde ANC. Die derde, en die belangrikste van alles, is dat ons die vertroue van die mense nodig het.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

38 Kommentare

jongste oudste gewildste
Martie Smartie

Met ander woorde, hy sê: ‘Mense, ek, my kabinet en my party is totaal onbevoeg, skelm, korrup en geweldadig, en daar is ‘n magdom van onomstootlike bewyse’. Dit is presies wat hy sê. En hulle bly aan bewind.

Cherokee

Dit is nie sulke goeie nuus as waarna dit lyk met die eerste oogopslag. As dit ‘n neiging sou meebring weg van die ANC, is die kritieke vraag ‘waarheen’.

Chris

Nêrens in die geskiedenis het ‘n terroriste beweging na ‘n suksesvolle politieke party gegroei nie. Nie dat die ANC ook juis ‘n suksesvolle terroriste bende was nie. Hulle het aan bewind gekom deur poltieke druk vanuit die westerse lande. Die bewyse is reeds lankal daar dat die groepie se dae gestel en die skrif aan die muur is. Hebsug, afguns en persoonlike verskille (etnisiteit) dra by tot die verval en val van die bende.

Schalk

blah blah blah. Mooi woorde maar die ore wat moet hoor , die hande wat moet gee pleks van neem ontbreek. Die prioriteit van alles op die verlede plaas vir rede tot mislukking moet verander na maak die toekoms reg en wyk af van die politiese interne beleid van ” ek verdien dit because I was part of the struggle”

Wondermaarnet

Is die gegriefde anc lid agter tralies vir saakbeskadiging? Seker nie en hoe lank het dit CR gevat om agter te kom die anc is in die moeilikheid? Hulle is nie net in die moeilikheid nie, hulle veroorsaak NET moeilikheid.