ANC-plakkaat tydens die 2011-verkiesingsveldtog
Die ANC in die Oos-Kaap het gesê hy het berigte ontvang dat kiesers met ANC-T-hemde glo by van die stempunte weggewys is.
“Ons het ʼn aantal berigte van ons party-agente en verkiesingstrukture in die provinsie ontvang dat die ANC-lede en -ondersteuners weggewys is omdat hulle ANC-hemde aangehad het,” het Mlibo Qoboshiyane, verkiesingskoördineerder van die ANC in die Oos-Kaap, in ʼn verklaring gesê. “Dit is ontstellend, omdat die verkiesingswette nie mense verhoed om party-klere aan te trek wanneer hulle stem nie.”
Volgens Qoboshiyane het dit veral in die plattelandse en afgeleë gebiede plaasgevind.
“Ons het die saak onder die Onafhanklike Verkiesingskommissie (OVK) se aandag gebring by die provinsiale bedryfsentrum. Ons sal die situasie steeds monitor,” het hy bygevoeg.
