ANC sê Botha was een van min wat vroeg besef het apartheid is verkeerd

Pres. Cyril Ramaphosa het Vrydag sy medelye betuig ná die afsterwe van oudmin. Pik Botha.

Die presidensie het in ʼn verklaring gesê dat Ramaphosa aan die gesin, vriende en voormalige kollegas van Botha dink in dié tyd.

“Pres. Ramaphosa het gesê mnr. Botha sal onthou word vir sy ondersteuning van Suid-Afrika se oorgang na demokrasie en vir sy diens in die eerste demokratiese administrasie,” lui die verklaring.

Die ANC het vanuit eie geledere laat hoor dat hulle hartseer is oor Botha se afsterwe. “Die ANC beskou Botha as een van die min lede van die NP wat al vroeg agtergekom het apartheid is verkeerd en ʼn misdaad teen die mensdom.”

Die ANC het gesê die party het uitgereik na die sogenaamde voormalige apartheid-“verligtes” soos Botha binne die konteks van die opbou van ʼn nuwe Suid-Afrika en vir hom ʼn rol in die regering van nasionale eenheid aangebied.

“Terwyl sommige argitekte van apartheid aangehou het om die vordering van demokrasie ná 1994 te ondermyn deur rassehaat aan te blaas, het Botha hom as deel van sy nuutgevonde insig aangesluit by die ANC in Tshwane in 2000.”

Intussen het voormalige pres. FW de Klerk in ʼn verklaring gesê hy verneem met groot hartseer van Botha se afsterwe.

De Klerk het gesê Botha was tydens die “intense gesprekke” binne die NP-leierskap in die 1980’s ʼn toonaangewende, konsekwente vegter vir hervorming, grondwetlike onderhandelings en die vrylating van Nelson Mandela.

“Hy was ʼn unieke en kleurryke persoonlikheid wat ʼn enorme bydrae gelewer het tot die vreedsame en grondwetlike oplossing van die reuse- historiese uitdagings waarmee ons voor 1994 moes wroeg. Hy was vir baie jare ʼn gewaardeerde kollega en ʼn vriend. Ek en my vrou, Elita, wil graag ons medelye aan Ina en sy familie betuig,” het De Klerk gesê.

Botha is vroeg Vrydagoggend in die ouderdom van 86 oorlede.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

65 Kommentare

jongste oudste gewildste
Paul

En nou leef hulle in ontkenning wat vandag in die land aangaan.

Vrinne

Mens word aan jou vriende geken.

Anoniem

Praat die een wat omgekeerde apartheid steun…

Jannie

Daar het jy dit…….sy meesters wat hy reeds voor 1994 gedien het, bring nou hulde aan hulle comrade!!!

lewies

Nou ken hy ten volle. Iets wat ons nie beskore is nie.