ANC sê Eskom-raadsvoorsitter se bedanking ‘lofwaardig’

Jabu Mabuza het Vrydag bedank. (Foto: Itumeleng English/ANA)

Die ANC sê die bedanking van Jabu Mabuza, Eskom se raadsvoorsitter, is ʼn “lofwaardige demonstrasie van verantwoordbaarheid”.

“Die bou van ʼn etiese ontwikkelingstaat plaas ʼn verantwoordelikheid op diegene wat verantwoordelik is vir staatsinstellings om te verseker dat die openbare belang voorrang bo enigiets anders geniet,” het Pule Mabe, ANC-woordvoerder, gesê.

Mabuza het laat Vrydag bedank.

In sy bedankingsbrief vra hy om verskoning vir Eskom se onvermoë om die belofte wat hy op 11 Desember verlede jaar aan pres. Cyril Ramaphosa, adj.pres. David Mabuza en verskeie ministers by ʼn vergadering gemaak het, na te kom. Mabuza het beloof dat beurtkrag eers ná 13 Januarie weer ingestel gaan word.

Beurtkrag is egter sommer al in die eerste naweek van die nuwe jaar in werking gestel en die adjunkpresident het die afgelope week gesê Eskom het Ramaphosa oor die situasie mislei.

Die ANC sê hy neem kennis van Mabuza se rede – dat hy nie sy belofte gestand gedoen het nie – vir sy bedanking.

“As ons die krisis by Eskom wil pak en oorkom, moet die raad versterk word met hernieude ywer om Eskom se omkeerstrategie in werking te stel,” het Mabe gesê.

“Eskom speel ʼn kritiek noodsaaklike en strategiese rol in die Suid-Afrikaanse ekonomie en dit is belangrik dat daar as ʼn saak van dringendheid bestendigheid in die Eskom-raad kom. Energiesekerheid is die grootste enkele bedreiging vir ekonomiese groei en vereis dringende en beslissende optrede.”

Mabe het gesê die ANC bevestig weer – soos vervat in die resolusies van sy 54ste Nasionale Konferensie – dat die land se staatsinstellings die drywers van ontwikkeling en sosio-ekonomiese transformasie is en versterk moet word om dié belangrike ontwikkelingsrol te vervul.

“In die resolusies neem ons kennis dat streng optrede nodig is om die bestuur en prestasie van staatsbeheerde ondernemings te verbeter deur te verseker vaardige personeel en gekwalifiseerde raadslede word aangestel. Hulle moet ook teen onbehoorlike inmenging beskerm word.”

Mabe het gesê die ANC weet dat Jabu Mabuza die leisels by Eskom op ʼn “uiters moeilike tyd” oorgeneem het en wel sy werk na die beste van sy vermoë gedoen het.

Ramaphosa het Vrydagaand gesê ʼn nuwe voorsitter vir Eskom sal binnekort aangestel word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

18 Kommentare

Koos ·

Nou wil hulle begin loop want daar is nie meer geld daar om te plunder nie.

Hans ·

Wanneer val Gordhan op sy swaard? Daar was probleem by SARS met hom, daar is ekonomiese probleme na hy Min van Finansies was, daar is probleme in sy huidige posisie… Daar was Guptha vrae..

Jannie van Niekerk ·

Die ANC kan nog meer ” lofwaartdig” wees as alle ANC amptenare wat onbekwaam is bedank…O gaats! Dan gaan daar van die President tot by diue raadslede in munisipaliteite nie ‘n enkelele siel oorbly nie!

Afrikaan ·

Prysenswaardig (?) maar ‘n saak van “too little too late”

André André ·

Om ‘n land ekonomies te kelder is mos gelykstaande aan volksverraad, of hoe? Soos om vir jou president te lieg, waarom word hy dan nie voor die Zondokommissie gedaag nie? Maklike uitweg is gevolg, val op jou swaard en vir die wond wat jy self veroorsaak het, word jy dan der miljoene betaal om die pyn te verlig!

(Maar Mabuza sou altyd en onafwendbaar die verkose een wees waarop die bot toegeslaan sou word om vrywilliglik in die geskiedenis sy plek in te neem as die groot geloofwaardige, wat hulle as voorbeeld by hul konferensies kan voorhou.)

En as ek nou as pensionaris op my eie swaard val, hoeveel sal die staat my betaal om die pyn te verlig, onthou ek sal ook soos Mabuza net ‘n vleiswond opdoen.

Gemaskerde Sopbeen ·

Nou waarom wag ons vir die “lofwaardige verantwoordbaarheid” by SABC, Denel, SARS, Prasa, SAL, die staatsdepartemente van Polisie, Gesondheid en Onderwys……..en elke geplunderde munisipaliteit? Wat vat so lank?

Johann cb ·

Hy het bedank omdat hy sien Eskom se probleme kan nie meer omgekeer word nie!

Daai man ·

Die meneer het gedink ‘n snaakse hoedjie is al wat nodig is om Eskom reg te ruk.

G ·

Hy was net tydelik in elk geval. Die anc probeer net punte wen.

K P ·

Ek moes ongelukkig gereeld luister na verskonings van die mannetjie met die mooi hoede. Maar my indruk was dat die man nie eintlik geweet het wat aangaan in Eskom of wat om te doen om die tragedie te stop

Ellende het 'n oorsaak ·

So dis prysenswaardig as mens uiteindelik handoek ingooi en erken jy weet nie hoe nie; sou meer beteken het as mens dit VOOR DIE AANSTELLING DOEN.

So vind hulle ná skade en skande uit, hulle kan eenvoudig nie die mas opkom nie. Mens ‘fake’ nie kennis en vermoëns nie…

Goed So. ·

Ellende, Ek dink hy sien die Zondo kommissie op die horison.

ChrisE ·

Ag asseblief tog. Ek het nie die vermoë om my afkeur en misnoë uit te spreek nie. Dink die mense regtig almal is geestelik versteurd of ons almal is nie toerekenvatbaar nie. Jy kan vir idiote, swape, imbessiele lieg, maar nie vir almal nie. Ek is nie die wêreld se skerpste persoon nie, maar asseblief respekteer my as mens en moenie my intelligensie onderskat nie. Een weet ek al gaan ‘n leun hoe snel, die waarheid agterhaal hom wel. Ek dink daar is na vandag ‘n al hoe groter onrustigheid in die bende se geledere. As ek die opkoms mee aan steun. Die bende se dae is getel en hulle weet dit. Hier kom nog sports. Sk ken modder en dit nie modder wat kom nie.

Al ·

As Mabuza nie gewaai het nie, sou hy gefire gewees het. Wat is so lofwaardig daaraan?

Joe Olivier ·

Die terugbetaling van alle fooie ontvang vir diens nie gelewer sou n lofwaardige teken van verantwoorbaarheid gewees het.

Asb ·

Dié storie is al soooo afgesaag. Die reg om mense vir poste by staatsdepartemente te kies en aan te stel MOET NIE dié ramaramp sin wees nie asb hy KAN NIKS doen sé of besluit wat tot vootdeel van land en enige lewende wese is nie dis oor en oor bewys.:-(

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.