ANC ‘teen onteiening sonder vergoeding’

Argieffoto: Reint Dykema

Argieffoto: Reint Dykema

Die ANC het in die parlement gesê hoewel hy ten gunste is van stappe om die ekonomie te transformeer, waaronder grondeienaarskap en -hervorming, is die party nie ten gunste van grondonteiening sonder vergoeding nie.

Nonceba Mhlauli, woordvoerder van die kantoor van die ANC-hoofsweep, het in ʼn verklaring gesê daar moet stappe gedoen word aangesien die regering te stadig vorder om die grondhervormingskwessie aan te spreek.

“Die ANC stem egter nie saam met die onteiening van grond sonder vergoeding nie. Ons glo dat regverdige en billike vergoeding die oplossing is vir die grondkwessie in Suid-Afrika, soos in ander Afrika-lande soos Lesotho, Zambië, Malawi en Namibië. Die grondkwessie moet op ʼn wyse hanteer word wat Suid-Afrikaners sal verenig en moenie lukraak gedoen word nie.”

Julius Malema, leier van die EFF, het Dinsdag in die parlement weer versoek dat die Grondwet gewysig word om voorsiening te maak vir grondonteiening sonder vergoeding.

Volgens Mhlauli het die parlement reeds ʼn grondwetlike hersieningskomitee en is dit die komitee se verantwoordelikheid om die Grondwet te hersien indien nodig. “Die parlement het ook ʼn hoëvlak-paneel op die been gebring om die impak van wetgewing rakende grondhervorming te ondersoek. Die paneel het reeds landwyd prosesse van openbare deelname gehou, so ons moet wag vir hulle verslag en dit hanteer.”

Mhlauli het gesê die departement van landelike ontwikkeling en grondhervorming het reeds onderneem om ʼn prekoloniale oudit van grondeienaarskap, -gebruik en -besetting te doen. “Sodra die oudit afgehandel is, sal ʼn enkele wet ontwikkel word om die kwessie van grondhervorming aan te spreek en die nodige grondwetlike wysigings sal onderneem word om hierdie proses te bewerkstellig.”

Volgens Mhlauli is die parlement reeds in die proses om die Onteieningswetsontwerp wat deur pres. Jacob Zuma na die Nasionale Vergadering terugverwys is te hersien. “Die Onteieningswetsontwerp stel dit duidelik dat eiendom slegs onteien kan word ingevolge ʼn algemeen geldende regsvoorskrif vir openbare doeleindes en in die openbare belang, onderworpe aan vergoeding wat billik en regverdig moet wees. Vergoeding gaan met ander woorde nie net op markwaarde gegrond wees nie, maar moet regverdig en billik wees, wat beteken alle relevante omstandighede moet in ag geneem word.”

Mhlauli het gesê die EFF se eis neem nie verskeie programme en hersieningsprosesse wat tans aan die gang is in ag nie. “Die programme en prosesse het ten doel om te verseker dat grond teruggegee word aan die mense van Suid-Afrika soos vervat in die Vryheidsmanifes.”

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

21 Kommentare

jongste oudste gewildste
Johan. H.

Mense asb… Ek smeek julle MOENIE Naief wees nie. Kyk asb die anc , eff se track rekord!!!!!,,Bewapen julself met kennis, En wees gewapen,, al maak dit jou depresief, Lees als oor hierdie mense , Praat met slagoffers,,,

Bittereinder

Ja, as jy die een glo, glo jy alles.

PJ

Kyk hoe gaan boere nou uitgemoor word

Willem

Ek wil nie as n rasis voorkom nie maar ek weet hoe ek voel in my hart ek vra net is daar nie n groep of instansie wat ek by kan aansluit wat besig is om voorteberei vir die oorlog wat kom

Lewies

Ek se weer wat ek in die verlede gese het. Wie is mans genoeg om ‘n toetssaak te maak oor al die uitsprake rondom “witkapitaal” “grondvergrype ens, ens wat in besonder teen die witman in hierdie land gemik is. Die aanstokers van hierdie rasistiese gesindheid se monde moet gesmoer word, al word dit in die parliment as vryheid van spraak gereken. Of is dit ‘n kan wurms wat lief nie oopgemaak moet word nie? Is ons bang vir die verlede?