ANC veroordeel FW de Klerk-stigting se uitlatings oor apartheid

Pule Mabe (Foto: Pule Mabe/Facebook)

Die ANC het ʼn verklaring deur die FW de Klerk-stigting veroordeel wat “ontken dat apartheid ʼn misdaad teen die mensdom was”.

Die ANC beskryf die verklaring as ʼn doelbewuste poging om die feite te verbloem.

Die FW de Klerk-stigting het in ‘n verklaring EFF-leier Julius Malema se aanval op die voormalige president tydens vanjaar se staatsrede veroordeel as “boelietaktiek om die demokratiese prosesse te ontwrig”. “Oudpresident en Nobelpryswenner FW de Klerk en sy vrou Elita moes [Donderdagaand] tydens die staatsrede herhaaldelike venynige aanvalle deur Julius Malema en EFF-LP’s aanhoor,” het die stigting gesê.

Die EFF het tydens die staatsrede versoek dat De Klerk uit die staatsrede geskop moet word, omdat hy die vorige week tydens ‘n onderhoud glo gesê het apartheid was nie ‘n misdaad teen die mensdom nie.

Die stigting het in die verklaring gesê “die idee dat apartheid ʼn ‘misdaad teen die mensdom’ was, bly politieke propaganda deur die Sowjetunie en hul ANC/SAKP-vennote om wit Suid-Afrikaners te stigmatiseer deur hulle te vergelyk met werklike misdade teen die mensdom – wat gewoonlik algehele totalitêre onderdrukking en die slagting van miljoene mense insluit.” Lees meer.

Pule Mabe, woordvoerder van die ANC, het Sondag in ʼn verklaring gesê De Klerk se bewering, in die onderhoud, 25 jaar later in ons demokrasie, wat ontken dat apartheid ʼn misdaad teen die mensdom was, is “ʼn klap in die gesig van ons verbintenis tot versoening en nasiebou”.

“Die ANC doen ʼn beroep op De Klerk en sy stigting om nie die verdrag te ondermyn wat die basis van ons demokrasie vorm nie. Die besluit en die motivering eerstens deur die Organisasie vir Afrika-eenheid (OAE) en daarna die hele wêreld deur die Verenigde Nasies om apartheid ʼn misdaad teen die mensdom te verklaar, is goed gedokumenteer. Die stigting is egter besig om hulself onkundig te hou en dit sal goed wees as hulle die geskiedenis navors.”

Mabe het bygevoeg apartheid as ʼn stelsel is op ʼn groot skaal gedoen en was sistemies, gegrond op geloof in die meerderwaardigheid van die wit minderheid en minderwaardigheid van die swart meerderheid. “Hierdie geloof het in die Unie van Suid-Afrika van 1910 uitdrukking gevind en gebou op die fondasie van kolonialisme en slawerny en oor 80 jaar van sistemiese verdrukking van die stemlose meerderheid.

“Dit het uitdrukking gevind in grondonteiening deur die Wet op Grond van 1912 en 1936, die gedwonge verwydering van mense, die meer as 17 miljoen Suid-Afrikaners wat tussen 1921 en 1986 in hegtenis geneem is oor paswette, die doelbewuste beleide om nie die swart kind op te lei nie, die uitsluiting van swart werkers en swart professionele persone van seker bedrywe, die verwoesting van voedselsekerheid van die meerderheid deur pasbelasting en grondonteiening en die lys gaan aan.

“Apartheid was ʼn gewelddadige stelsel van verdrukking en onderontwikkeling en die Verenigde Nasies het in 1973 dit korrek verklaar as ʼn misdaad teen die mensdom, gedefinieer as ‘onmenslike dade wat gepleeg is vir die doeleindes om dominasie deur een rassegroep of persone te vestig en uit te bou bo enige ander rassegroep of persone en hulle sistematies te onderdruk’.

“Die land is dus geskok en ons wil almal weet: Mnr de Klerk, was apartheid enigiets anders as dié definisie wat deur die hele wêreld onderskryf word?”

Mabe het gesê die ANC sal nie die projek van nasiebou laat vaar nie. “Ondanks uiters onverstandige verklarings deur die stigting, sal die ANC nie ontspoor word van sy projek om die nasie te herbou uit die as van apartheid en die nalatenskap van armoede, werkloosheid en ongelykheid nie.

“Ons sal steeds saamwerk om menswaardigheid vir almal te verseker en die opdrag voortsit wat in die Grondwet gestel is ‘om die ongeregtighede van die verlede te erken, die verdeling van die verlede te herstel, en ʼn samelewing te vestig gegrond op demokratiese waardes, maatskaplike geregtigheid en fundamentele menseregte’.

“In die belang daarvan om nasiebou en versoening te bevorder, doen die ANC ʼn beroep op die FW de Klerk-stigting om onvoorwaardelik sy onverantwoordelike verklaring terug te trek en sy toewyding te wys om ʼn Suid-Afrika te bou wat ons almal wil hê,” het Mabe bygevoeg.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

27 Kommentare

jongste oudste gewildste
Snowball

Liewe ANC, niemand wil die nasie òf die SA hê waaraan julle tans bou nie. Dis ‘n misdaad teen alles wat goed en reg is, want julle floreer in korrupsie en met 54 moorde ‘n dag is julle direk en indirek verantwoordelik vir die hool waarin SA verander het. Julle het ‘n ‘cheek’ om te dink iemand moet aan julle ‘vereistes’ voldoen vir enige iets. Julle is die grootste mislukking en golf van verwoesting wat hierdie land nog ooit beleef het.

Johan Venter

Hier is goeie raad vir die ANC, hou op om verskoning te soek en jul ore aan praatjies uit te leen, jul reaksie maak nie ‘n vaal kol aan die realiteit nie: Beweeg aan, julle kan niks aan die verlede verander nie, dit lyk my die gewilligheid ontbreek om iets aan die toekoms te doen, maar miskien moet julle tog hierop ag slaan: Julle en die ANC regering moet vir julle 3D drukkers, soos Sjina kry, dan kan julle al die strukturele probleme en gebreekte toerusting tjoeftjaf, sommer binne ‘n japtrap by al die Staatsbeheerde instellings regmaak, ook onderhoud doen,… Lees meer »

Manie

Sjoe ja wys jou nou net weer Nou is ons weer op dieselfde ou lyne

Antoinette

Xenophobia is ook ‘n misdaad teenoor die mensdom. So ook verkragtings, kindermolestering/moord, mense vermoor vir R50 of weerlose mense op plase aanval en vermoor. En wie mag ek vra is die grootste oortreders? Ek praat nie apartheid goed nie, allermins, maar “practice what you preach,” EFF. Dissiplineer ‘n slag julle eie mense.

Nell

Nee Mabe, ek wil beslis nie die RSA hê wat ‘julle” wil hê nie, want met sulke stene (bedrog, plundery, moord, korrupsie ens., ens., ens.) kan g’n mens ‘n nasie bou nie.