André Pienaar tronk toe gestuur

André Pienaar buite die hof op Senekal. (Foto: Maroela Media)

André Pienaar is Donderdag in die streekhof in Bethlehem tot tronkstraf gevonnis in verband met die oproer by die Senekal-landdroshof in Oktober 2020.

Pienaar (53), ’n sakeman van Senekal, is kort na die voorval in hegtenis geneem. Die oproer het tydens die verskyning van twee mans in verband met die moord op Brendin Horner plaasgevind.

Pienaar, wat op verskeie aanklagte, waaronder brandstigting, poging tot moord en aanranding met die doel om ernstig te beseer, tereg gestaan het, is uiteindelik net op een aanklag, openbare geweld, skuldig bevind.

Hy het ’n pleitooreenkoms met die staat aangegaan en is ingevolge artikel 276(1)(i) tot vyf jaar gevangenisstraf gevonnis, het Louis Pienaar, sy regsverteenwoordiger, gesê. André kom nadat hy ’n sesde van sy vonnis, 10 maande, uitgedien het in aanmerking om die res van sy vonnis onder korrektiewe toesig uit te dien.

Volgens Louis kan sy kliënt selfs vroeër onder korrektiewe toesig vrygelaat word vir onder meer goeie gedrag.

André het aanvanklik nie beplan om die hofverskyning by te woon nie. Hy het egter gegaan en het met Horner se pa, Robbie, gesels. Van die ander mense wat die dag se verrigtinge bygewoon het, het glo vir André gevra of hy weet wat aangaan. Talle mense het later die hofgebou bestorm.

SJ Fourie, die eienaar van ’n insleepdiens, is ook later in verband met die voorval in hegtenis geneem. Alle aanklagte is egter Donderdag teen hom teruggetrek.

Honderde duisende rand is vir André en Fourie se regskoste ingesamel. Louis het bevestig dat die res van die geld gebruik sal word om na André se vrou, Talitha, en hul twee minderjarige dogters om te sien.

Genevieve de Jager, ’n vriendin van André en die vermoorde Horner, was deurentyd betrokke by die saak en meen dit is hartseer dat André sy stem dik gemaak het teen plaasmoorde en nou daarvoor moet boet.

“André is nie ’n krimineel nie, maar was ’n held gewees. André het geskree wat Brendon nie kon skree nie en nou moet hy agter tralies slaap. As ’n gemeenskap is ons harte seer en ek stem nie saam met die vonnis nie.”

‘Hulle wil ’n voorbeeld van my maak’

André het verlede jaar in ’n onderhoud met Maroela Media gesê hy was nie betrokke by die beskadiging van die hofgebou of die polisievangwa nie.

“Ek dink hulle wil dalk ’n voorbeeld van my maak. Ek weet regtig nie.

“Die gedagte dat ek dalk tronk toe moet gaan, bly my heeltyd bly. Die tronk is hel op aarde, en ek verkies om eerder dood te gaan as om in die tronk te sit.”

André het destyds gesê hy voel asof hy die pad alleen stap, hoewel honderde mense daardie dag aan die optog deelgeneem het.

“Dit is in hierdie tyd wat ʼn mens veral ondersteuning kort.”

  • Die berig is gewysig sedert dit aanvanklik gepubliseer is. – RED

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

63 Kommentare

jongste oudste gewildste
piper

is daar ooit iemand tronk toe na die natal onluste. klomp mense dood en miljoene se skade. absoluut rasisties.

Jessica

n Man met n harseer hart en opstaan teen plaasmoorde. Ons almal was liederlik kwaad en kon slange vang. Nou gaan hy tronk toe?? Hy het nie eens iemand doodgemaak nie??? Wat van al die ander trawante wat skade maak , wat van die moordenaars? Maar as jy n blanke vel het , word ander reëls toegepas. Ons regstelsel is perfek, maar die uitvoer daarvan is beroerd.

Willem

Ek sal liewer nie vir jou se wat ek regtig wil nie.

pdbpta

Skandelikke partydigheid en onewewigtigheid van die Staat. Eers as ALLE opstokers met soveel passie en wrewing landwyd vervolg en gevonnis word, sal geregtigheid herstel en eiendom en die Reg beskerm word.

Renier johannes

Waar is branden se moordenaars